Texts

Return to review | Return to list

Korpilakši: Karjalan yksi kaunehimmista kylistä. 4

history

August 16, 2023 in 11:19 Нина Шибанова

• created the text
• created the text: TITOVIEN TA PUŠKAR’OVIEN ŠUVUT Titovit ollah muukalaisie. 1750-luvulla heijän kantatuatto Martin tuli Korpilahteh Kučjärveštä. Hänen Tit-pojašta (kuoli 1813) ollah Titovit. Ivan Titovin (1810–1868) naini Fedosja Antonovna šai yhekšän poikua: Timofei, Ivan, Mihei, Nazar, Luka, Gerasim, Mihail, Kirill, Aleksei. Mihail, a pereheššä Mihailo Titov (1851–1915) akottu myöhäh (yli 40 vuotta vanhana) Marja Stepanovna Pavlovalla Petrinvuarašta. Heilä šynnyttih Ivan (1893), P’otr (1902), Klavdija (1900), Avdotja (1906), Aleksandra (1909), Natalja (1912). Mihailo Ivanovič Titov šiirty tuo nilmasih 1915, a hänen naini – vuotena 1942. Puškar’ovit ollah Šärkijärven kyläštä kotosin. Terentii ta Fedosja Puškar’ovien poika Konstantin (1875–1937) juurtu Korpilahteh akottuon vuotena 1907 neiččyöllä Irina Ivanovna Sergejevalla. Hyö venčäyvyttih Rukajärveššä. Antilahan puolešta tovistajina oltih muanmiehet Kuz’ma Sergejev ta Ivan Lukin. Nuoret elettih apin talošša lapšien Ivanin (1910), Jakovin (1913) ta Anastasijan (1913) kera. Puškar’ovien talouvešša oli kolme des’atiinua muata šekä heponi, lehmä ta pieni karja. EPIDEMIJOJA TA TULIPALOJA Vuuvven 1833 kevyällä Korpilahešša alko rokkoepidemija. Erityisešti kärši Jevsei Nekkojevin pereh. Kahešša päiväššä hiän mänetti nellä tytärtä. Heilä oli kymmenen, kuuši ta kolme vuotta ta yhekšän kuukautta. Lapšien tauvit monta kertua tuotih tuhuo kylih. Kylällä tulipalot oltih šuuri hätä. Pakkaiskuun 13. päivänä 1846 palo Aksentii Timofejevin talo kaikkine elokšineh (isännän mieleštä šinčissä kirposi kynttilä). Vahinkon summa oli 400 hopierupl’ua. Kotiväki (13 henkie) ei käršitty. Kaikin pelaššuttih, muun muašša kakši lašta vuottaja naini. Rukajärven volostin miehet, kumpasih kuuluttih Korpilahen talonpojat, oltih aševelvollisie. Vuotena 1849 “kuuvvešta ruatajašta” rekruuttiloiksi otettih Ivan Nekkojev. 1850-luvulla otettih Aleksei Matvejev, Prokopii Nekkojev, Ivan Kondratjev. Vuotena 1863 armeijah lähettih Hariton Matvejev, Ilja Nekkojev, Mitrofan Kondratjev. Ivan Sergejev niise oli aševelvollini, ka kunne lienöy läksi. Hänen tilah kučuttih Terentii-veikko. Tuli šelväkši, jotta hiän oli luku- ta kirjutuštaitoni. Šajekuušša 1851 alkanut rokkoepidemija vei lapšie Kurčijevien ta Aksentjevien perehistä. Kahešša päiväššä kuoli Ivan Lukinin kolme lašta. Kuuvven vuuvven piäštä rokkoh kuoli platenččoja Šuurešša Tiikšissä, Tiikšijärveššä, Merilahešša, Rukajärveššä, Ontajärveššä. Šillä kertua rokko mäni Korpilahen kyličči. Vuotena 1853 korpilakšilaiset uuvveštah keššettih tulipalo. Še tapahtu yöllä 11. šajekuuta. Palo erähän talonpojan talo kaikkine elokšineh. Uhrija ei ollun. Vahinko oli 65 rupl’ua. Rukajärven volostin talonpojat lähettih kylistä tienuamah kauppiehan Bel’ajevin puutavaranuittoh. Ruato oli vuarallini, oli ušeita kuolintapahukšie. Elokuun 26. päivänä 1874 varomattomuon vuokši tragisešti kuatu 16-vuotini korpilakšilaini nuorukaini Timofei Petrov. Hiän uitti puutavarua Segeža-jovella. Ruumis löyvettih muutomašta päiväštä, hauvattih Segeža-kylän lähellä. Vuosišuan alku Rukajärven volostissa harmitti tulirupiepidemija, mih oraškuušša 1900 kuoli lapšie Ontrosenvuarašša, Rukajärveššä, Kuušiniemeššä, Ontajärveššä. Korpilahešša kuoli Jegor Nekkojevin tytär. YHTIJÖN TA KOULUN PERUŠ-TAMINI Oli peruššettu Korpilahen kylän yhtijö, kumpani kuulu Rukajärven volostih. Yhtijön stuarostoina eri aikoina oltih ontajärviläiset talonpojat P’otr Hotejev, Kuz’ma Osipov. Korpilahešta volostin keškukšeh oli 35 virštua talvitiellä ta 38 virštua kešätiellä. Korpilahešša oli aitta, missä šäilytettih semstvon vil’l’avarua. Vantina ta hoitajana oli Mihail Matvejev, kenen velvollisukših kuulu tulojen ta mänöjen laškomini. Vuuvven 1890 lopušša hiän otti vaštah 189 jauhošäkkie, mit painettih 1745 puutua ta 17 paunua. Vuotena 1893 varan tarkaštamisen aikana tuli näkyvih jauhon puuteh. Huomijoh otettih hiirien šyömyä jauhuo ta painon vähennyttä kuivamisen ta kulettamiseh aikana. Lopulta Matvejevin piti makšua 77 rupl’ua 96 ¼ kopeikkua 48 puutan ta kahen paunan šäkistä. Pakotettih makšamah kolmevuotisella ošittaismakšulla. Välttämisen tapahukšešša piti jättyä kanšallini oikevušeččo. Mihail makšo toičči kolme rupl’ua, toičči viisi. Makšua koko summan “autto” čuarin tytär. Vuuvven 1898 šulakuušša šuuren ruhtinattaren Tatjana Nikolajevnan šyntymisen muissokši gubernijan semstvon virašto issunnošša piätti hävittyä Matvejevin vajauš. Šulakuun 8. päivänä 1893 korpilakšilaisilla oli šuuri tapahtuma – luku- ta kirjutuštaitokoulun avuamini. Še toimi P’otr Aksentjevin talošša. Opaštajana oli Vasilii Gromov, koulun pitäjänä – Tit Kondratjev ta hoitajana ruato Ivan Lukin. Koulušša opaššuttih talonpoikaislapšet Korpilahešta ta Ontajärveštä: 13 poikua ta 11 tyttyö. Opaštujien miärä kašvo. Vuotena 1894 heitä oli 37 henkie. Vuotena 1895 Irina Aksentjeva, Stepanida Nekkojeva, P’otr Timofejev ta ontajärviläiset Vasilii ta Nikolai Romanovit šuoritettih tentit šeuruavista opaššušainehista: uškonto, venäjän kieli, kaunokirjutuš, lašku. Vuotena 1896 luku- ta kirjutuštaitokoulu muutettih semstvon yhen luokan opistokši. Laitoš toimi vuoteh 1919 šuaten. Kyläh tuli opaštaja Ol’ga Aleksandrovna Konopko (1888). Perušopaššušainehien lisäkši hiän opašti uškontuo. Muutoma korpilakšilaini oli kauppuajina talonpoikina. Hyö elettih pohjosešša piäkaupunkissa tahi šen ympäristöššä. Kuz’ma Matvejev Petergofin ujestissa harrašti vähittäiskauppua. Nazarii avasi oman liikkehen ta eli Oranienbaumissa. Piiterissä elettih Mihail (Sadovaja-kavulla, 74) ta Aleksandr Sergejevit. Heijän puoleh kiännyttih kotikyläläiset ta volostin eläjät eri pyyntölöineh. Nazarie kyšyttih lahjottamah Rukajärven Panteleimonin časoun’an korjaukšeh. Nazarii šuoštu.