Texts
Return to list | edit | delete | Create a new | history | Statistics | ? Help
L’ubov’ Baltazar. Luadogan meren legendu. 2
L’ubov’ Baltazar
Luadogan meren legendu. 2
Livvi
New written Livvic
Ainoshäi on
muga – gu ollou vai kustah midä mieldykiinittäjiä , löydyygi mostu rahvastu , ket oman hengen hinnal ollah valmehet sidä tiijustelemah .Mugai nygözes Priozerskan , sillozes Keksholman linnas , sada vuottu tagaperin oli tiedoiniekkoin sektu , "noituuslahko ".Sih kuului ruoččilaine mies Juhan Sigvord (1883), kudaman ezi-ižät vie oli oldu sidä linnoitustu panemas .Sidä enne häi oli elänyh Germuanies , Pol’šas , Vengries , opastunnuh oli Göteborgas merimiehekse , ga siepäi ajettih juuri sentäh ku häi kuului sektah , kuduan ruaduo kieldäy kirikkö .Sit häi oli tulluh elämäh Kägisalmeh (Priozerskah ).Eli ičekseh eriže olijas talois da jatkoi kiellettylöin tiedoloin tutkindua .Oligo se tozi vai ei , ga kirjutetah buite häi oli löydänyh linnoituksen kivizeh seinäh muuratun kniigan .Sigvord rubei uskomah sih , buite se , ken maltanou valloittua Luadogan meren voiman , roih kaikkien pohjas olijoin uardehien ižändäkse .Vuvvennu 1937 Juhan Sigvord osti motorlaivan da andoi sille nimen – "666" da mualai sen laivan rungoh .Häi rubei joga yödy sil laival käymäh mereh .Midä liene ruadanuh da tiedoinnuh , ga moizinnu yölöin rahvas ainos kuultih jyrizendiä da ulvondua merelpäi .Kerran elokuun 31.päivänny vuvvennu 1939, Pyhän Ulafan pruazniekkua vaste häi lähti mereh , ga järilleh ei tulluh ...
Toizen Muailman voinan aigua kezäkuus 1942 lendäi Manfred fon Rigtgofen omas lendokonehespäi oli nähnyh Luadogas laivan "666".Häi oli ambunuh da bombitannuh laivua , ga ammukset mendih läbi , eigo luajittu sille nimidä pahua ...
Voinan jälles vuvvennu 1955 randukyläs gostis olles Sem’on Skrudnev lähti Luadogah motorvenehel , ga kerras rodih paha siä da hänen veneh uppoi .Sem’on nägi lähäl ruostunuon motorlaivan da maltoi nosta sih .Laivas oli ylen vilu da äijäl kuaričči muval .Laivua ohjuamas seizoi mies pitkis sovis .Sem’onan kyzymykseh : "Kunnebo menemmö ?", se oli vastannuh : "Toizel ilmal !"Sem’on oli hypännyh vedeh da uidanuh randah , mies odva ei uravunnuh sen jälles .
Ei muga ammui piiteriläzet eččijät oldih Luadogas voinan aigua upottuu mašinua nostamas .Jo kai oli valmis nostamizeh , ga kerras kaikin kuultih ulvondan , miehil rodih paha , a siiriči hil’l’akkazin uidi ruostunuh laivu "666".Kui saneli eččijöin laivan kapituanu , priborat ei ozutettu nimittumua laivua , ga miehet nähtih sen , dai järven pinnal yhtelläh jäi liikkujan laivan jälgi ...Sen jälles net miehet , ket oldih sil kerral laivas , ei enämbiä tahtottu lähtie mereh .Sil kerdua kaikin jiädih eloh , ga nostua merespäi sidä mašinua ei voidu .Sanotah , Luadogu ei nimidä omis uardehis anna ilmai ...
Vie yksi tapahtumu oli vuvvennu 1982 kezäl Ladožskii-kezäleirin lapsienke .Illal kolme brihaččuu mendih Luadogan rannale da muijien laivoin keskes nähtih motorlaivan , sen kapituanu kučui dai hyö nostih laivale .Binoklih kaččonuh kazvattai oli nähnyh laivan rungos numeron "666".Lapsii eččimäh oli nostettu äijy voimua , ga heidy enämbiä niken ei nähnyh ...
Tiijos da rahvahan mustos olijois jälgimäine kerdu , konzu rahvas nähtih laivan "666", oli vuvvennu 2008 tuhukuun 27.päivänny Volhovan lahtes .Tuuli oli katkannuh suuren jiäpalan , kudamal oli tuhat hengie kalastajua .Juuri puolenyön aigua lähäl azetui motorlaivu , da nelli kalastajua kiirehes nostih sih , toizetgi juostih , ga ei ehtitty , laivu lähti .Kai net miehet sie ollah tänäpäigi .
Tämä on vai yksi Luadogan legendu .Ga ehki se on kaikis lähin meijän aigah , elos ollah niilöin tapahtumien silminnägijät .Elettähes legendat dai suarnat , vai jiädäs ristikanzat hengih .
Luadogan meren legendu. 2
Livvi
New written Livvic