Texts
Return to review | Return to list
Kerran Mietečköissä
history
October 04, 2023 in 17:04 Нина Шибанова
- created the text
- created the text: Tämä istorija oli Mietečköissä endizen šadavuuven keškivälissä. Šilloin Mietečköissä oli vielä äijä eläjiä, enämbi šadua. Oli sel’sovietta, kumbazen predana oli Lisicin Nikolai Ivanovič. Oli šilloin Mietečköissä kolhoza nimellä ”Vper’ot”. Predana oli Gorbačov Vasili Petrovič Hmel’ovkašta. Oli küläššä kolhozan pravlenja. Täh kolhozah kuuluttih vielä Pal’čova (Paha Pal’čova) i Hmel’ovka. Mietečköissä šilloin oli šuuri ferma, enämbi 60 lehmiä. Palčovalla oli vielä ferma, vain pienembi kuin Mietečköissä. Hmel’ovka kuulu Pal’čovan brigadah. Električestvua šilloin ei ollun, žentän dojarkat lüpšettih lehmie käzillä. Ühellä dojarkalla pidi lüpšiä jogo päiviä kümmenen lehmiä. Že ei ollun kebie ruado. Dojarkana ruado i Žukova Praskovija. Hänen mužikka Egor Ivanovič oli brigadirana. Heillä oli kolme lašta, kaikki tütöt.Vanhein, Ljusja, eli jo linnašša. Nuoremmat elettih koissa omankeh tuatonke da muamonke. Pienemällä Lizalla oli šilloin viizi vuotta. Ka, ühen kerran tuli Praskovija huomnekšen lüpšännäštä i hänellä pidi koissa emannoija. Ruaduo oli äijä. Ka hiän i šano Lizalla: «Liza, auta miulla, šüötä pikkarazet tipazet kananke.Toi pudruo, rahkua i käški: »Mučo tipazilla varoin!» I kuin hänellä oli kiireh, läksi pertih. Liza küžüü: «I tipazet pidäü muččuo?» Praskovija ei oigein kuuvlun i šano: «Mučo, varane, mučo!» Emannoiččou Praskovija pertissa i kuulou: Liza itköü, kana šiändünnün ijänellä haukkuočou. Praskovija hüpähti i nägöü: tipazet kaikki ollah duavittu. Liza itkien šanou: «Mama, šuuri tipa ei anna iččiedä muččuo, toruačou!» Praskovija rubei luvettelemah: «Avoi-voi, avoi-voi, varane, midä ruavoit!?» Tädä istorijua Mietečköissä vielä moni vuotta muissettih i nagrettih, kuin Liza auto muamollah. Nikolai Grigorijev, Pieteri