Texts

Kui myö keräimmö muur'oidu

October 18, 2023 in 16:47 Александра Родионова

created the text
created the text translation
created the text: Nygöi onnuakko jo on jygei uskuo, gu muarjat oldih ylen tärgiet syomižet karjalažis perehis. Kezäruadoloin keskes muarjan keriändy oli toižel sijal jälles heinargie. Meijän L'okinsellällyö, vähembi puoldu kilometrii Kel'l'uniemen dorogua myöte, oli pieni suo. Sie vähäžin kazvoi muur'oi, must'oi, buolu da garbalo. Sit sidä suodu myöte myö kačoimmo jogo muarjat ollah kypsät, jogo voibi mennä loittombi meččäh suurele suole. Äijy muarjužikkuo oli Keskoijärven dorogal. Se oli vähäšty loittombi. Enzimäžikse kypseni muur'oi da šl'uboi. Net ollah kaksi nimie yhten muarjan. Muur'oit sežo ollah kypsät muarjat. Net jo ei olla vihandat, net ollah vähäžel keldažet. Niidy on ylen magei syvvä, vai račketah hambahil. No net ei pätä ni piiruah ni varen'n'ah, sentäh gu roijah kovat dai talvekse ei sua jättiä, hapatah terjämbi. Sit pidäy vuottua kuni hyö roijah šl'uboikse. A šl'uboit net ollah ihan kypset, mehevät, keldažet muarjat. Kerätä niidy on, tiettäväine, jygiembi. Konzu myö kävyimmö meččäh, annettih kai kaksi ast'ettu. Šl'uboit myö keräimmö rengižeh jöngöi, puhtahannu ihan, a poimiččužeh libo virššižeh keräimmö muur'oloi tuppiloinke. Sit net koiš päiväs toižes jöngöi muututtih šl'uboikse. Tuppižet jiädih rohtokse rygimižes.