Texts
Return to list | edit | delete | Create a new | history | Statistics | ? Help
Jakovlev Sergei . Merellä apulaini
Jakovlev Sergei
Merellä apulaini
Karelian Proper
New written karelian
Ken
ei ole merellä käynyn , še ei ole Jumalua molin .(pomorien poverkka )
"Mistä kulet , hyvä mieš ?"
"Meren tuolta puolelta ".
"Pitän matan olet keštän ,
Pyörähtele stolah .
Juomma čäijyt , šanelet ,
Mitä missä kuulit .
Näkyy šiušta , jotta šie
Etähyätä tulit .
Kohta kyly rauniutuu ,
Reppänän jo typin ,
Naini keittäy iltasen ,
Panen kylyryypyn ".
"Šattu , jotta miula piti
Vienanmerie myöten ajua .
Miula rohkevutta riitti ,
Läššä šeiso pieni laiva .
Tälläyvyttih kalamiehet ,
Vehkehijä kuntoh pantih ,
Šuorittih hyö nuotan vetoh ,
Meri hyvin kalua antau .
Laiva vettä myöten kulkou ,
Ei niketä nävy vaštah ,
Ei nimistä hätyä kuulu ,
Vesi laivan laitua kaštau .
Huoli komentajua koškou ,
Näkyy šuuri tuulen pešä ,
Pohjosešta pilvi noušou ,
Kuinpa laiva myrškyö keštäy ?
Et nikunne mäne pakoh ,
Eikä rantua , eikä muata ,
Myrškyn häntä ieššä näkyy ,
Tulou tovellini hätä .
Tuuli piekšäy meijän laivua ,
Kohta meitä pohjah šuattau ,
Isköy ualtoloilla laitah ,
Vettä tonnimittoin kuatau .
Mie še hyvin rohkie olen ,
Čuarin kera kävin šotah ,
Hankuralla tapoin kontien ,
Šurman kera vietin yötä –
Niin mie kyllä ennein smietin ,
Enkä nähnyn varajantua !
Nyt vain piätä huppuh peitin ,
Moliutuos’s’a vuotin rantua .
Kalamiehet omua ruatuo
Toimitettih käškömättä ,
Myrškyjä jo monta šatua
Vienanmeri heilä näytti .
Nyt še pöläššyttih miehet ,
Pakautetah toini toista ,
Käsie ojennetah eteh ,
Šielä näkyy kummanmoista .
Vettä myöten heilä vaštah ,
Puitto late olis alla ,
Pyhä vanhuš poikkoh aštuu ,
Muššat vuattiet pantu piällä .
Nousi laivah , risti šilmie ,
Šitä kyytie meri lauhtu .
Miehet hämmäššyttih šiinä ,
Ukko šanou vakavaiseh :
"Jumalua vain pitäy molie
Tätä mertä kierrelleššä .
Elkyä varakkua , mie olen
Varlaami Kieretistä ".
Merellä apulaini
Karelian Proper
New written karelian
"
"