Texts
Return to list | edit | delete | Create a new | history | Statistics | ? Help
Vera Larionova. Kolme keppisty
Vera Larionova
Kolme keppisty
Livvi
New written Livvic
Elettih
da oldih kolme puuhistu keppisty .Kučuttih heidy : Vahnembaine , Keskimäine da Nuorembi .Keppizet gu keppizet , kačahtai heihpäi , ga et eroita toine toizes .Korgevuttugi oldih yhty .Vaigu sit hyö eroittih – omat emändät oldih keppizil .Vahnembal – näbei Maša-buabo , Keskimäzel ‒ rohkei Dun’a-buabo , Nuorembal ‒ vesseläine Marpu-buabo .Joga päiviä meijän keppizil oli yksi ruado ‒ vardoija omii emändii , avvuttua heile astujes .Keppizien emändät oldih ystävinny .Oli heile enämbi 80 vuottu .Pyhinpäivin buabat kerävyttih bes’odah .Kolme keppisty seizottih yhtes čupus , piät vastai , kuunneltih paginoi , pajoloi , toiči tävvyttih itkuh , toiči pačkavuttih nagroh .Ga enämbi oli vesseliä päiviä .Niken keppizien paginoi ei kuulluh , vaigu iče keppizet voidih ellendiä toine tostu .
Dun’a-buabo nouzi pyhänpiän huondeksel .Kippezen vuoh astui pezemäh silmii .Sidoi piäh valgien paikkazen , ielleh keppizen kel hil’l’akkazin hiivoi kuhn’ale syömäh huondesveruo da vuottamah omii ystävii bes’odah .Keskimäine keppine tiezi , kui hänen emändäle on jygei astuo : jälgimäzil vuozil silmät ruvettih pahoi nägemäh .
Oli buabal hyvä mieli , gu pyhänpiän tullah bes’odale ystävät .Buaban Niina-tytär jo valoi čuajun , varusti kuašan , vai istuokseh da syvvä .Buabo istui da söi , a keppine seizoi čupus , menetti aigua vuottajes omii dovariššoi .Helähytti mobil’niekku .
‒ Kenbo sie heläittäy ? kyzyi Dun’a-buabo .
‒ Sinun ystävy Marpu , kuččuu minuu vastuamah , ei voi yksinäh yläh jyrkis pordahis nosta , ičehäi tiijät , jalgu hänel on kibei , sanoi Niina .
Kodvazen peräs častuškan kel pertih tuli Marpu-buabo , jaksoihes uksičupus da keppizen oman čuppuh azetti .
‒ Mibo sinun kel tänäpäi rodih , gu olet nengoine vesseläine ?
‒ Mibo , ga vävvy huondeksel tuli . Pidäy häi vävvyy kiittiä , kerdu pihal laučazelluo heinäzet niitti , gu minule päivypastozes olis hyvä istuo .Enhäi voi olla kiittämättäh , sanoin : "Täs den’gat , menes laukas čekkine osta ".Pyhänpäivän čottah minägi sadagrammua juon .
Nuorembi keppine sanou dovarišale :
‒ Kačo vai , minun buabal on ruskei nenä , seičas hol’ahuttau častuškua .
Marpu-buabo rubei pajattamah :
Kohtu puolel soitto kuuluu ,
Kuldoi bes’odah tulou .
Ei häi tule soiton kel ,
Tulou suuren joukon kel .
Dun’a-buabogi myödäh rubei pajattamah :
Pajatakkua , tyttörukat
Alavožen randažii .
Suvaikkua työ , tyttörukat
Alavožen brihazii .
‒ Vot olet , tungittos keskeh .
Vuota minä nygöi pajatan .
‒ Pajata !
Senmoizen paginan kuunneltih keppizet .Marpu-buabo rubei vie pajattamah :
Keräin , keräin kivysty ,
Akat kyzyttih :
‒ Mikse ?
Minä vastah heile sanoin :
‒ Anuksen brihoil n’amukse .
Buabat viegi pajatettas častuškua kiistai , ga Niina sanoi :
‒ Kaččuot vai , tua jo Maša-buabo keppisty huškuttau , meile on tulemas .A mittuine on häi näbei : jubkaine kodazil piäl , valpas kurtkaine da čoma šliäppäine piäs .
Keppizet čupus ihastuttih .Rodieu heile vessel , tulou heijän dovariššu , rubieu šuuttimah .Ruvettih hyö nagramah , ga yhtelläh , keppizilgi on herky syväin .Hyö kai toimitetah , midä buabat paistah , midä on heile mieles , ainos ollah varuksis tulla heile abuh da astuo omien emändien kel rinnal .Maša-buabo azetti keppizen čuppuh , istuihes ystävien keskeh .
Niina kyzyi :
‒ Maša-buabo , mittuine sinul on čomaine šliäppäine , kusbo nengozen ostit ?
‒ Piiterih ajelin ostamah .
‒ Mikse Piiterih . Onhäi kaik-enjyttystygi meijän laukois .
‒ Nengostu ei ole . Minägi iče maltan niegluo šuapkoi dai biriettoi , ga nygöi pahoi näin .Enhäi rubie silmii rikkomah .A gu tiä laukas ostazin , ga sit rubizin yhtenjyttyzis šliäpis toizien kel kävelemäh .A minä sidä en suvaiče .
Piiterispäi minuu omal mašinal bunukku toi .Da viegi oman "nobukan " minule andoi .
‒ Mikse sinulles noutbukku nygöi pidäy , et häi malta sil ruadua ?
‒ Syvvä ei pakiče , anna vai čupus seizou , modnohäi on .
Paginan keskusti Marpu-buabo :
‒ Sinä šliäppiä ostat , a minä tyttörukale avvutin fatieru ostua , 50 tuhattu annoin abuh ostajes .
‒ Kusbo den’gua otit ?
‒ Kus , kus , suolain . Penzien vai tuvvah , kerras den’gazen suoluan .
Nuorembi keppine sanoi toizile :
‒ Se Marpu-buabo muga sanou , konzu häi kabrastau den’gazen bokkah toičakse .
Pagizou Marpu-buabo omal kielel .Häi on ruadanuh lypsäjänny .Kaiken ijän suvaičči šuuttie , korottua .Maltoi lad’d’ata častuškoi elaigah nähte , tiezi äijän sananpolvie .Arvakkua , midä tahtoi sanuo buabo :
‒ Ei jiä ni riis , ni raččahas , ni sitti paččahas .
Maša-buabo oli ruadanuh turistoin kel huogavundukois .Toinah otti heispäi uuttu moudua , aiven suvaičči čomendellakseh .Dun’a-buabal on rohkei taba , dai pagizou häi rohkiesti .Vikse ruado karasti tavan .
Dun’a-buabo on ruadanuh splau nois , brigadiirannu souhozas , oligi deputuatannu .
Naizet istuttih , paistih omua elaigua .Marpu-buabo rubei pajattamah Kazvatti muamo minuu -pajuo .Hänel oli korgei iäni .Ylen abeitti pajattajes .Dun’a-buabo hil’l’azeh kylčetti , silmih nostih kyynälet .Häi rubei kiittämäh omii bunukkoi :
‒ Egläi minuu tiijustamah tuldih mollei tyttöbunukkazet .Ukkailtih , sebäiltih minuu , žiälöijäh .A brihačču-bunukku on ezmäine abuniekku kaikis ruadolois .
Keppizilgi čupus igävy rodih pajuo kuunneltes .
Kodvan vie paistih buabat da juodih čuajuu piirualoin kel .
Kerävyttih lähtemäh kodih .Keppizet oldih ainos varuksis , hyö tiettih ‒ ei sua hätkestyö čuppuh seizomah .Matku heidy vuottau .Heijän buabat ollah optimistat , elajan suvaiččijat , ainos liikutah edehpäi .
Niina kučui buaboi tulemah toiči bes’odale .Avvutti heittyö pordahis mollembale vuorokkai da kaimai muaman ystävii Julaman kel .
Huondes .Ruadopäivy .Nouzin aijoi .Kaččahtimmos ikkunah .Dorogua myöte kiirehtäjen astuu 92-vuodine Maša-buabo .Yhtes käis – maidobitonaine , toizes – puuhine keppine .Hyviä , kebjiedy matkua sinulles , Maša-buabo , tervehytty , ozua da iluo .
Kolme keppisty
Livvi
New written Livvic
‒
‒
‒
‒
‒
‒
‒
‒
‒