Texts
Return to list | edit | delete | Create a new | history | Statistics | ? Help
Joudoaigu
Joudoaigu
Livvi
New written Livvic
– In’a , oletgo sinä
joudavu školan jälles ? Pidäygo sinul tänäpäi muuzikkuškolah vai ei pie ?
– Ei pie . Minul egläi oldih urokat muuzikkuškolas .Olen joudavu tänäpäi .
– Tahtozin kuččuo sinuu uinduallikkoh . Jo ammui emmo käynnyh uidelemah .Läkkä ehtäl kävymmö .
– Ga läkkä . Nämmien päivien aigah oli ylen äijy ruaduo školas da muuzikkuškolas , himoittau kunnetahto muijale kävvä da huogavuo .
– Hyvä ! Näimmökseh ehtäl !
– Katti , ongo sinul äijy joudavua aigua ?
– Ei ole . Argipäivinny olen školas , školaspäi tulduu luajin kodiruavot .Sit ehtäl opastun teatrustuudies da kävyn ruadamah volont’ourukeskukseh .
– Midä sinä ruat volont’ourukeskukses ?
– Minä ruan ekolougizel alal . Meijän piäruavonnu on luonnon akkiloiččemine .Myö alalleh piemmö tallohruadoloi .Niilöin aigah kabrastammo puustoloi , pihoi , jogiloin da järvilöin randoi .Keviäl istutammo puuloi da tuhjozii .Talvel syötämmö linduzii , iče luajimmo syöndykodazii niilöile .Vie myö puaksuh vastavummo nuorienke ,sanelemmo heile omas ruavos da sellitämmö , kui on tärgei pidiä luonduo puhtahannu .
– Se on ylen tärgei ruado . Ongo teil äijy ruadajua ?
– Meijän joukos ruadau viizitostu omatahtostu – volont’ourua . Minä tiijän , ku moizii ruadojoukkoloi meijän linnas on enämbi kymmendy .
– Ol’a , sinä kuulut nuorižon yhteiskunnallizeh yhtistykseh . Mi on teijän yhtistyksen piäruadoloi ?
– Myö ruammo karjalan kielen da karjalazen kul’tuuran hyväkse .
– Äijygo rahvastu on teijän yhtistykses da ollahgo hyö karjalazet ?
– Meijän yhtistys on perustettu puolivuottu tagaperin , sendäh sit vie ei ole äijiä rahvastu . Meijän keskes on karjalastu dai ven’alastu .Ei ole tärgei , mittumua kanzua on ristikanzu .Tärgei on se , ku häi tahtou ruadua karjalan kielen da karjalazen kul’tuuran hyväkse .
– Midä puolesvuvves työ ehtittö ruadua ?
– Otimmo ozua Karjalan kielen nedälih , sen aigah Nuorižokeskukses piimmö karjalan kielen maltajien tiedokilvan . Kučuimmo sih karjalan kielen opastujii linnan mollembis školispäi .Karjalan kirjukielen päivänny , 20.sulakuudu , myö kirjutimmo saneluu karjalan kielel .Meijänke yhtes sidä kirjuttamah tuldih 35 hengie .
Joudoaigu
Livvi
New written Livvic