Texts
Return to review | Return to list
Parahim voden kirj
history
December 23, 2021 in 01:16 Nataly Krizhanovsky
- deleted the comments of the source
October 04, 2019 in 12:52 Нина Шибанова
- changed the text
Petroskoiš tuli lophu sur’ konkurs, kudamban nimi oli ”Karjalan valdkundan parahim 2008 voden kirj”. Konkursan tegii om Karjalan kul’turministerstv. Konkursan aigan parahimiden kirjoiden ližaks oli arvostadud völ toižid-ki kirjoid erazvuiččiš nominacijoiš. Täl vodel parahimaks voden kirjaks tuli ”Jevangelie”-kirj, kuna om keratud lujas äi čomid Müd Mečevan, tutaban pirdajan, kuvid. Nece-žo kirj oli hüvin arvosteldud kaikil tulnuzil adivoil, ked oliba kirjoiden ozutelusel. Pidab sanuda, miše ”Kirjan čomuz’”-nominacijas ”Jevangelie”-kirj sai mugažo ezmäižen sijan, a ”Ostrova”-paindišt, kudamb pästi necen kirjan, sai čoman pauklahjan. Parahiman karjalan, vepsän isuomen kelen kirjan oli nimitadud ”Periodika”-paindišton erazvuiččid kirjoid. Muga Jevgenii Klementjevan ”Karjalaižed” da Zinaida Strogalščikovan ”Vepsläižed”-monografijad saiba neciš nominacijas ezmäižen sijan. A naku ”Karjalaižed sarnad”- kirj suomen i venän kelel da Natalia Sinickajan ”Iriška”-karjalankeline kirj jagoiba neciš nominacijas toižen sijan. Ei jänu homaičemata Aleksandr Volkovan-ki ”Venehes”-karjalankeline runoiden da starinoiden kogomuz, kudamb sai nominacijas koumanden sijan. Pagištes ”Periodika”-paindišton satusiš, pidab sanuda, miše se oli hüvin arvostadud völ ühtes nominacijas – nece ”Parahim kirj lapsiden täht”. Sid’ ”Karjalaižed sarnad”-kirj möst tuli sil’mnägubale i sai hüvän arvznaman. Konkursan lopus Kul’turministerstvan radnikad kitiba kaikid konkursan ühtnikoid. Ved’ niid täl vodel oli 842. Tulijal vodel nece konkurs linneb jo kümnenz’, jubileikonkurs, sikš sen tegijad tahtoiba vähäižen vajehtada sändoid. Hö planuičeba tehta mugažo nel’l’ nominacijad, vaiše kaikuččes nominacijas linneb üks’ sija. Pauklahjoiden-ki mär vajehtadas, se linneb vähäižen suremba.