Texts
Return to list | edit | delete | Create a new | history | Statistics | ? Help
Natalja Sinitskaja. Yksinäine Palagu
Natalja Sinitskaja
Yksinäine Palagu
Livvi
New written Livvic
In’a buabahke puaksuh
käydih Palagu-buaballuo .Palagu eli omas pienes kodizes järves poikki ihan yksinäh .
– Pidäy lähtie hos Palagastu tiijustua . Eiga yksinäinehäi gor’a on , sanoi buabo .
– Kuibo se – yksinäine ? ihmetelli In’a .
– Sendäh on yksinäine , ku hänel nikedä omua ei ole . Ukko viestittäh voinal hävii , Palagu jäi kahten lapsenke .Ga net pienete vie kuoltih .Mugai ei mennyh häi enämbiä miehele .Dostalin ijän eli yksinäh , hos leskekse jiädyy oli vie nuori da ylen čoma .Händy sanottih nuorete kyläs – čoma Palagu .
Vahnah Palagah kaččojes In’a nikui ei voinnuh uskuo , ku konzuto buabo oli čoma .Nygöi Palagal oldih harmuat tukat da häi kezälgi pidi piäs paikan al villastu šuapkua , ihan ku pieni lapsi .Räkel päivälgi Palagu istui kois kuatančois da aiven paheksi viluu .Rožas hänel oli menetiijä mi hienuo ruppistu , se oli ku muršittu bumuagu .
"Paha on yksinäh eliä . Eigo ole kenenke paista , eigo abieloi da igävii sanuo ...", duumaičči In’a ičekseh .
Palagu joga kerdua ihastui buaban da In’an tulendua .Häi kerras rubei šeimimäh , panemah stolale kaikkie , midä vai oli .
– Pädöy toinah sinul , kogo arteli bunukkua on : elät gu piäsköin pezäs , luvetteli Palagu da silitteli In’an piädy .
Buabo da Palagu taratettih elettyy , juohatettih toine toizele ken kenele rodn’aks tulou .Buabo saneli Palagale uudizii : ken nai da miehele meni , kenele lapsi rodih , ken kuoli .
In’a silkeskie istui stolas , puhui hiilavah čuajuh da kasteli sih pečen’n’ua .Se tuli nenäh homehel .Buabo (sellittiä ) jo In’al , mindäh pečen’n’at (tulla ) homehel .
– Palagazel on pieni penzii . Häi ostau n’amuu vai gostih niškoi da pidäy niidy ruokos .Ga harvattavah hänellyö rahvas kävväh ...
Yksinäine Palagu
Livvi
New written Livvic