Texts
Return to list | edit | delete | Create a new | history | Statistics | ? Help
Tatjana Boiko, Tamara Ščerbakova. Päiväzen aittu. 7
Tatjana Boiko, Tamara Ščerbakova
Päiväzen aittu. 7
Livvi
New written Livvic
Kuivu
jogi kruugaleh kierdäy Segavosuon .Yhtele puolele suodu ulvou koiru , a toizele – ulvou hukku .Tuuli häilyttelöy puuloi da kandelou niilöin voiveroituksii da ulvomizii kogo ymbäristyö myö .Tuulele on yksikai ken ulvou : puugo , koirugo – ristikanzan ystävy , vai hukkurašku – ristikanzan vihaniekku .Tuuli pettävästi tuou hukan korvih hyllätyn koiran igävän ulvomizen .Harmai eroitti koiran ulvomizen puuloin voiveroituksis da vongundois , hil’l’akkazin piäzi peittopaikaspäi da nouzi mägyččäzele .Häi arbai koiran ulvondukohtan , pitkil askelil libui juoksemah Antipičan mökkizehpäi .
Ozakse , Trafka loppi igävän ulvondan , gu oli äijäl nälläs , a toinah tunnusti uvven ristikanzan kuččumizen .Toinah hänen , koiran mielis , Antipič ei kuolluh , a vai muutui toizekse ristikanzakse .Toinah joga ristikanzas häi nägi Antipiččua da vuotti , konzu se uuzi Antipič kuččuu händy iččeh luo .Sit häi rubieu avvuttamah uvvele ižändäle ihan muga , kui avvutti vahnale ...
Se mugaigi oli : omal ulvondal Trafka kučui iččeh luo Antipiččua .
Hukku , kuultuu koiran ulvomizen ristikanzan puoles , täytty jalgua työndyi juoksemah sih puoleh .Koiru puuttunus Harmuale hambahih , ku vai ulvonus vie minuuttua viizi .No "malitun piettyy " Antipičale koiru nälgävyi , vaikastui da kiirehel lähti eččimäh jänölöin jälgii .
Oli moine vuvven aigu , konzu yöelätti – jänöi – ei viere muate huondeksel , gu varaten da huaristellen viruo kai päivy .Keviäl se valgiel aijal varuamattah kodvin juoksendelou avvonazil paikoil : dorogoil da peldoloil .Jälles sidä , konzu lapset riidavuttih da lähtiettih eritroppazii myöte , yksi moine vahnu peldojänöi ugodii tulla sih kohtah Virujan kiven luo huogavumah .Jänöi pöllästyi tuulen tuiskuu da puuloin vongundua , hypästih Virujan kiven piälpäi muale da työndyi juoksemah omah jänöin luaduh , lykkijen tagasorkii edeh , ihan sih , ristikazale pahah kohtahpäi , Sogieh hettiehpäi .Häi vie ei hyvin lykännyh valgieloi karvoi , juostes niilöin kabuzet pakuttih muale , jiädih rippumah tuhjoloil da kuivil mullozil heinil .
Jälles jänöin istundua kivel meni jo äijähkö aigua , no Trafka vainui peldojänöin jällen .Häi ei hypännyh kerras juoksemah niidy myö sentäh , ku täs kivele oldih vie kahten pienen ristikanzan da viršizen jället , kuduat tuldih leiväle da kartohkale .
Koiru ei tiedänyh midä ruadua : juostago Sogien hettien puoleh peldojänöin jälgii myöte , kunne sežo viettih yhten pienen ristikanzan jället , vai juosta toizen ristikanzan jälgii myöte oigieh puoleh kierdäjen Sogiedu hetetty .
Tämä jygei kyzymys sellittynys ylen terväh , ku voinnus arvata , kudai ristikanzu otti keral leivän .Vot gu olis syvvä palaine sidä leibiä da juosta jänöidy tabuamah ei ičele syödäväkse , a tuvva se sille ristikanzale , kudai andau palazen leibiä .
Kunnebo juosta , kuduah puoleh ?..
Konzu rahvas puututah nengomih tapahtuksih , hyö ruvetah duumaimah , a koirah niškoi sanotah : se keskel kadoi .Ihan muga keskel kadoi Trafka .Sit ihan gu joga ajokoiru , rubei pyörimäh , nosti piän yläh , n’uusteli kai ymbäri .
Nast’oin puolespäi tuuli toi tuttavan duuhun , se terväh azetti koiran hovun .Trafka seizoi kodvazen , sit nouzi , ihan gu jänöi , tagakäbälil ...
Ennen , konzu vie oli elos Antipič , Trafkanke oli tämänmoine tapahtumine .Mečänkaččojal oli jygei ruado – jagua meččiä hallokse rahvahale .Antipič jätti Trafkan kodih , ku se ei olis tiele , sidoi sen kiini koin rinnal , a iče aijoi huondeksel enne päivännouzuu lähti .Vai päiväl Trafka ellendi , što čieppi toizes puoles on sivottu raudukr’uukkah sangiel nuoral .Häi nouzi salbomel tagakäbälil , ezikäbälil tabai nuoran , rubei iččie piästämäh , ildupuoleh katkai nuoran da čiepinke kaglas lähti eččimäh Antipiččua .Jo enämbi puoldu päiviä oli mennyh Antipičan lähtendäs , hänen jället ei tunnuttu jälles vihmua .Mečäs kogo päivän oli moine hil’l’u , ei tuulahtannuhes nikuspäi , ilmas pikoi vähäzel tundui tabakan savvu .Koiru ylen terväh ellendi sen , što jälgii myö ei sua löydiä ižändiä , häi nosti yläh piän , tabai nenäh tabakkuduuhun , juoksi sil peräh , toiči kaimai sen , sit myös löydi .Ildupuoleh tuli ižändän luo .
Oli moine tapahtumine .Dai nygöi , konzu tuuli toi nenäh leivän duuhun , koiru buitegu koveni , rubei vuottamah .Konzu tuuli uvvessah toi sen duuhun , häi kui silloi , nouzi tagakäbälil da varmah sai tiediä : leiby da kartohkat ollah sit puoles , kuspäi tuulou da kunne meni yksi pieni ristikanzu .
Trafka uvvessah tuli Virujan kiven luo , löydi poimičun jället , n’uusteli net da verdaili duuhunke , kudun toi tuuli .Sit kaččeli toizen pienen ristikanzan da peldojänöin jället .Voibi vai arbailla koiran mielet :
"Peldojänöi matkai kohti päivyunel , se on kustahto täs , läs Sogiedu hetetty , nikunne ei pagie , rubieu virumah kogo päivän .A ristikanzaine leivänke da kartohkoinke voibi iäre lähtie .Mibo on parembi : juoksendellago jänöile peräh , ku tavata da revitellä se ičele syödäväkse , vai suaha palaine leibiä armahis käzispäi da vie toinah tundie sit ristikanzas Antipiččua ".
Koiru vie kerran kačahtih jälgih , kuduat viettih kohti Sogieh hettieh , valličči sen troppazen , kudai oigiedu puoldu myö kierdi Sogien hettien , vie kerran nouzeldi tagakäbälil , lekahutti händiä da kiirehel lähti juoksemah sih puoleh .
Päiväzen aittu. 7
Livvi
New written Livvic
"
Пришвин Михаил
Кладовая солнца. 7
Russian
"