Texts

Return to review | Return to list

Mindäh kylys pieni ikkun

history

September 23, 2024 in 17:04 Нина Шибанова

• created the text
• created the text: Suuri, astun kylyh yksin. Muamo minul avuau uksen. – Sano, muamo, mindäh kylys Ollou moine korgei kynnys? Minä harpuan odva-odva! – Lämmin pyzyy kylys kodvan! – Sano, muamo, mindäh savu Nouzou valgei, sagei-sagei? Sendäh, ku en kylyy löydäs? Vai ei minuu tihit syödäs? – Midä savu sagiembi, Sidä löyly magiembi! – Sano, muamo, midäh laučču Ollou kylys nenga levei? Olis sijua panna staučču? – Sikse laučču kylys levei, Konzu olit vačas pieni, Laučal sinuu suamah vierin! Kummua sanot, muaman sanat Toiči vaikastumah pannah! Muamo pezöy muilal piän, Vaste silmät avvoi suan. Suun huuhtou viel muamo, Olen uvvessah jo iänes. – Mindäh kylys pieni ikkun? Ku niken ei nägis minuu? Mindäh yhten parren levei? – Sendäh yhten parren levei, Kahten parren välis puolin, Pilattu ei partu poikki. – Mindäh levei uksi laittu? Emmo rinnakkaihäi astu, Ethäi käzi käes harpua! Etgo tiijä? Sit hos arbua! – Sendäh levei uksi kylys – Sinuu kandelemmo yskäs! Tozi, en nimidä sano – Jalloilleh vai kois pannah. Räken tirpan, engo suutu Maltan kyzyö vie uuttu. Midä laudazilpäi näen – Kerras plökkiän, muamal sanon. – Mindäh nenga äijy nogie Kylyn seinis ainos ollou? – Eihäi kylys seinii pestä! Nogiparzi märrän kestäy! Seinis ielleh kačon lageh, Muamo sengi, näen, arbai. – Sano, mindäh lagi madal? Vähäine – dai piäl kosken? – Lagi madal laittu sendäh Koivuvastan vaigu nostan, Kerras tabuan löylyt selgäh. Laudazet on korgiel. Sendäh. – Mikse latties leviet ravot, Hiiri kerras menöy pagoh! – Kuzbo kylys hiirdy näit? Kažinkego tänne käit? Ravot ollah leviet sendäh – Ligaviet muah mennäh! Avoi-voi da avoi-voi, Muamanke nimid’ en voi! Kaiken tiedäy, kyzy ielleh! Muga vastuau, ga ni peräh Kerras kyzyö en voi! Avoi-voi! Muga paginanke, kahtei, Tunne en kui higi lähtöy. Eigo vastu čökitännyh, Eigo muilu itketännyh. Muaman talmukäit pehmiet Pestih jallat, piän, sellän. Senčoih minuu laučal pani, Avai uksen – tuatto nägi. Kabaloičči hurstih kuni, Tuatto ottamah jo tuli. Muga meni kylyildu – Mindäh-sendäh, sikse, sildy...