Texts
Return to list | edit | delete | Create a new | history | Statistics | ? Help
Jumalan rahvas piäzöy huogavumah
Jumalan rahvas piäzöy huogavumah
Livvi
New written Livvic
7 On
muga , kui sanou Pyhä Hengi : – Tänäpäi , gu kuuletto Hänen iänen , 8 älgiä kovendakkua omua syväindy , kui ruattih teijän tuatat , konzu hyö nostettih käzi Minuu vastah , opittih Minun mielii elämättömäs muas . 9 Sie hyö opittih Minun tirpandua , hos nähtih Minun ruavot n՚ellänkymmenen vuvven aigua .
10 Sikse Minä suutuin heijän piäle da sanoin : "Ainos hyö ollah sydämeči yöksyksis ". Ei hyö nouttu Minun dorogoi , 11 sikse Minä vihas annoin lujan sanan : "Hyö nikui ei piästä Minun huogavundukohtah ".
12 Kačokkua , vellet , gu nikel teis syväin ei olis paha da uskomatoi i työ etto kieldävys eläväs Jumalas .
13 No avvutakkua toine tostu joga päiviä , kuni voibi sanuo "tänäpäi ", gu riähky ei muanittas nikedä teis da ei kovendas teijän syväindy .
14 Meilhäi roih yhtehine oza Hristosanke , gu vai voinnemmo loppuh suate pyzyö sit uskos , kudai meil oli allus . 15 Täh niškoi on sanottu nenga : – Tänäpäi , gu kuuletto Hänen iänen , älgiä kovendakkua omua syväindy , kui ruavoitto silloi , konzu nostitto käin Händy vastah .
16 Ketbo luajittih nenga : kuultih , yksikai nostettih käzi Jumalua vastah ? Kaikin net , kudamat Moisein vietettävinny lähtiettih iäre Jegiptaspäi .
17 Kenen piäle Jumal oli vihas n՚ellikymmen vuottu ? Niilöin piäle , kudamat luajittih riähkiä da kudamien luut jiädih elämättömäh muah .
18 Kelle Häi andoi sanan , gu hyö ei piästä Hänen huogavundukohtah ? Sanankuulemattomile .
19 Sen myö näimmögi : hyö ei voidu piästä sinne , gu ei uskottu .
4
1 Jumalan uskalmo piästä Hänen huogavundukohtah on vie väis . Sendäh pidäy vardoijakseh , gu nikedä teis ei löyttäs dorogale jiännyönny .
2 Kuulimmohäi myögi hyvän viestin huogavundah näh juuri muga , kui meijän ammuine rahvas . No tämä kuultu sana ei tuonnuh heile nimidä hyviä : eigo hyö uskottu sih , eigo se tartunuh heih .
3 A myö , kudamat rubeimmo uskomah , piäzemmö huogavundukohtah . Sanoihäi Jumal niilöih toizih niškoi : – Muga kui Minä vihas annoin lujan sanan , "hyö nikui ei piästä Minun huogavundukohtah ", hos Häi oli azunuh huogavundukohtan valmehekse jo muailman luajindua myö .
4 Myö sen tiijämmö sen periä , midä Häi sanou Kirjutuksien kudamaslienne kohtas seiččemendeh päiväh niškoi : "Seiččemendenny päivänny Jumal huogavui kaikis omis ruadolois ".
5 A tuas enne sanotus kohtas Häi sanou : "Hyö nikui ei piästä Minun huogavundukohtah ".
6 Ga sit on tozi , gu erähät piästäh sinne , a toizet , kudamile hyvä viesti annettih tiediä enzimäzikse , ei piästy sinne sanankuulemattomuon täh . 7 Sendäh Jumal pani uvven piäzendypäivän , "tämän päivän ". Häi vet äijiä myöhembi Davidan suul sanoi ielpäi mainitut sanat : – Tänäpäi , gu kuuletto Hänen iänen , älgiä kovendakkua omua syväindy .
8 Gu jo Jošua ollus vedänyh rahvahan huogavundukohtah , Jumal ei paissus toizes päiväs , kudai tulou myöhembi .
9 Sendäh Jumalan rahvahal huogavundupäivän pruazniekku on vie ielpäi .
10 Ken piäzöy huogavundukohtah , se huogavuu omis ruadolois , kui huogavui Jumal oman ruavon ruattuu .
11 Pangua sit kai väit , gu piästä sih huogavundah , gu niken ei ottas kuavua niilöis sanankuulemattomis da ei katkies dorogas .
12 Jumalan sana on elävy da vägevy . Se on terävembi gu mitahto kaksiteräine miekku ; se pystäy syväh , eroittau mielen da hengen , nivelet da luut , se suudiu sydämen tahtot da mielet .
13 Ni mi ei ole peitos Jumalaspäi . Kai , midä on luajittu , on pal՚l՚ahannu da avvoi Hänen silmien ies ; Hänele meil pidäy andua čottu .
Jumalan rahvas piäzöy huogavumah
Livvi
New written Livvic
1
Послание ап. Павла к Евреям. 3:7-19 - 4:1-13
Russian
1