Texts
Return to review | Return to list
Enšiluokkalaini Matti Vatanen
history
November 20, 2024 in 16:48 Нина Шибанова
- created the text
- created the text: Aakkoset Kerran oppitunnilla enšiluokkalaini Matti Vatanen veti kaššašta Anni Kapustinua, kumpani istu šamašša pulpetissa Matin kera. – Miun tuli ikävä olla. Šuatan jo lukie ta kirjuttua, Matti šelitti omua ruatuo. – Kiät kuin iče tartuttih Annin kaššah. – Šiun on ikävä olla, ka mintäh häiričet toisie opaššukšešša? opaštaja moitti Mattie. – Enhän ole häirinnyn Annin opaššušta, oikeuvenmukasešti pani vaštah Matti Vatanen. – Hiän vet niise hyvin tietäy kaikki kirjaimet! Hammašharja Matti Vatanen ei tykännyn puhistua hampahie. Hiän äšen kekši starinan šiitä, jotta Šyöjätär ta Drakoni vietih kerran hänen hammašharja korpimeččäh, kunne harja jäiki. Tietyšti, eikä Šyöjätär eikä Drakoni konšana tultu Matin kotih, šentäh hänen oli pakko puhistua hampahie hammašharjalla. Matti Vatanen oikein tykkäsi starinoja. Starinašša elämä on aina mukavampi, mitä tovellisuošša. Erehyš Tuatto ta muamo paistih rikeneh, jotta Matin koulu on vain parin aškelen piäššä heijän talošta. Kerran Matti piätti tarkistua, onko še ihan totta. Huomenekšella koulumatallah hiän laški tarkkah enšin kakšikymmentä šeiččemän aškelta, šiitä kolme aškelta lisyä, ka šiitä šekautu aškelmiäräštä… “Aikuhisetki toičči erehytäh”, Matti piätti. Valkie ta mušta Matin ämmö lukou šakkilehtie. Kerran Matti valičči kaikkein vaikeimman šakkitehtävän ämmön leheštä. Šiitä hiän ratkaisi šen oikein ruttoh: “Valkie alottau ta voittau”. Šiinäpä še. Olkua hyvä! – Ratkaisit viärin, ämmö nyökytti piätäh, kun Matti näytti hänellä kaikki kekšityt šiirrot. – Viärin! – Olisinko voinun ratkaissa oikein, kun en ieš tunne šakin šiäntöjä… Rakkahušrunoja Kotitehtävie ei ollun äijän. Matti Vatanen šuoritti nellä laškuopillista tehtävyä, oppi pykälän luonnontiijon oppikirjašta ta šiitä kyšy ämmöltäh: – Olisko meilä rakkahušrunoja kotikirjaššošša? – Onhan tietyšti. Eikö šiun ole aikaista lukie niitä? – Onhan še aikaista, Matti myönti. – Ka kuiteski on pakko valmistautuo tenttih. Pari päivyä ei mitänä muuta.