Texts
Return to review | Return to list
Uden voden praznikad baboinke
history
January 24, 2025 in 15:08 Нина Шибанова
- created the text
- created the text: Uz’ voz’ om kanzan praznik, a sikš miše olen sündunu Toižeges, kaikuččele praznikale ajaskelen külähä. Minun täht nece om parahim aig vodes. Uz’ voz’ da Raštvad minun kanzas oma tärged aig, meil om ičemoi sihe sidotud tradicijoid. A kaik tradicijad oma sündnuded baboin taguiči. 31. tal’vkud homendesel minä kaiken lähtlin baboin adivoihe čomitamha kust, tehmaha salatoid da paštmaha magedoid pirgoid (vai pirgoid vävule). Baboil oli ičeze neniden pirgoiden paštandan recept, mitte sirdäse meiden kanzas sugupol’vespäi toižehe. Minä tedan necen receptan laps’aigaspäi. Baboi openzi mindai, kut tehta tahthast, äjak pidab panda saharad. Oli-ki meiden kanzas mugoine vero: läz kaik pirgad oma magedad, a kuverz’-se oma solanke da monetoidenke. Ken söb pirgan solanke, linneb ozakahan, a kenele putub pirg monetanke, sil linneb bohat voz’. I kaikuččen voden mö varastam, konz kenni sanub, miše hänele putui mugoine pirg “sürprizanke”. A konz ehtal mö vanhembidenke da sizarenke mänim ehtlongile babannoks da dedannoks, kuzen al meid jo varastiba lahjad. Baboi pagiži, miše ned oma Pakaižukolpäi. Jäl’ghe ehtlonged baboi da dedoi tuleskeliba adivoihe mijale, miše ühtes vastata Ut vot da kacta lämoiambuskelust (sal’utad). I muga, kaik ühtes, mö mänitim aigad. Raštvoin-ki meil om ičemoi tradicijoid. Mö mugažo paštoim pirgoid vävule. No pävero om tehta pel’menid. A ehtal ištta ühten stolan taga kanzanke da pagišta. Minun baboi Valentina lujas armasti necidä praznikad, da hänele oli tärged, miše kaik oliži tradicijoiden mödhe. Nece Uz’ voz’ oli ezmäine, konz händast ei olend meidenke, no hänen muštoks mö kanzanke tegim kaiken, kut hän navedi. Oliba magedad pirgad, pel’menid, salatad, lämoiambuskeluz. I tedan, miše nece tradicii eläškandeb jo äi vozid, da minä iče sirdän sen toižele sugupol’vele. I vodespäi vodehe Uden voden praznikan aigan stolan taga keradamoiš kaikel kanzal, kut navedi minun armaz baboi.