Texts

Return to review | Return to list

Vavilonan suudo

history

January 25, 2025 in 20:03 Нина Шибанова

• created the text
• created the text translation
• created the text: ¹ Minun luo tuli yksi niilöis seiččemes anhelis, kudamil oli seiččie mal՚l՚ua, da sanoi: «Tule, minä ozutan sinule, mittuine suudo annetah sille suurele karguajale, kudai istuu vezien piäl, ² sille, kudamanke karrattih muailman suarit, i kudaman karguanduviinal humalduttih muan eläjät». ³ Hengi valdai minuu, i anheli vedi minuu elämättömäh muah. Minä näin naizen, kudai istui tuliruskien zvierin selläs.^ Zvierih oli kaikkielpäi täydenäh kirjutettu kirovonimie, i sil oli seiččie piädy da kymmene sarvie. ⁴ Naine oli šuoritettu purpuranruskieh da tuliruskieh sobah, čomendettu kullal, kallehil kivil da žemčugoil, a käis hänel oli kuldaine mal՚l՚u, kudai oli täyzi tylgevytty da hänen karguanduligua. ⁵ Hänen oččah oli kirjutettu nimi, peittonimi: «Suuri Vavilon, karguajien da muailman tylgevyksien muamo». ⁶ Minä näin, se naine oli humaldunnuh jumalanuskojien verel da niilöin verel, kudamat saneltih tozi Iisussah näh.^ Hänen nähtyy minä diiviin sidä äijäl. ⁷ Anheli sanoi minule: «Mikse sinä diivit? Minä avuan sinule tämän naizen peittomerkičyksen dai sen zvierin peittomerkičyksen, sen, kudai kandau händy selläs da kudamal on seiččie piädy da kymmene sarvie. ⁸ Zvieri, kudaman sinä näit, oli, no nygöi sidä ei ole.^ Se nouzou vie pohjattomas havvaspäi, no menöy häviendäh. Net muan eläjät, kudamien nimet ei ole kirjutettu elaijankniigah muailman luajindua myö, diivitähes zvierin nähtyy, sikse gu se oli, nygöi sidä ei ole, no sit se jiävihes. ⁹ Täh pidäy äijy ellendysty da mieldy. Seiččie piädy net ollah seiččie mätästy, kudamil istuu naine.^ Net ollah vie seiččie suarii: ¹⁰ viizi niilöis jo hävittih, yksi on, a yksi vie ei tulluh.^ Konzu häi tulou, hänen olenduaigu roih lyhyt. ¹¹ A zvieri, kudai oli da kudamua nygöi ei ole, on kaheksas suari; segi on yksi seiččemes da menöy häviendäh. ¹² Kymmene sarvie, kudamat sinä näit, ollah kymmene suarii, kudamat ei vie nostu valdah, no hyö suajah suarinvaldu da kodvaine pietäh valdua yhtes zvierinke. ¹³ Yksis mielin hyö annetah oma vägi da valdu zvierile. ¹⁴ Hyö kaikin ruvetah toruamah Vuonua vastah, no Vuonu voittau heidy.^ Häi vet on ižändien Ižändy da suariloin Suari, a Hänenke voitetah kučutut, vallitut da suremattomat». ¹⁵ Anheli sanoi minule: «Viet, kudamat sinä näit, kus istuu karguaju, ollah muailman rahvahat, rahvasjoukot, muat da kielet. ¹⁶ A kymmene sarvie, kudamat sinä näit, da zvieri – hyö vihatah karguajua da kiškotah hänel sovat piäl, jätetäh händy alasti, syvväh hänen lihat da poltetah händy tuhkakse. ¹⁷ Jumal panou heijän sydämih himon täyttiä Hänen mielet da yksis mielin andua suarinvaldu zvierile, kuni ei täytytänne Jumalan sanat. ¹⁸ Naine, kudaman sinä näit, on se suuri linnu, kudai pidäy valdua muan kaikkien suariloin piäl».