Texts
Return to list | edit | delete | Create a new | history | Statistics | ? Help
Vavilonan häviendy
Vavilonan häviendy
Livvi
New written Livvic
1 Jälles
tädä minä näin : vie yksi anheli heityi taivahaspäi . Hänel oli suuri valdu , i hänen taivahalline valgei valgai muan .
2 Häi kirgai kovah : – Kuadui , kuadui suuri Vavilon ! Se rodih kaikkien karuloin eländysijakse , kaikkien paganhengien olendusijakse , kaikkien paganlinduloin pezäkse , kaikkien paganoin da tylgielöin zvierilöin olendusijakse , 3 sikse gu kai rahvahat juodih hänen karguandan uravuttajua viinua , muan suarit karrattih hänenke , muan kauppumiehet bohatuttih hänen bohattuos , hänen piäličimiäräzes elaijas .
4 Minä kuulin taivahaspäi toizen iänen , kudai sanoi : – Työ , minun rahvas , lähtekkiä iäre hänespäi , gu etto yhtys hänen riähkih da gu teile ei tulis hänen moizii pahuzii . 5 Hänen riähkät nostih jo taivahah suate , i Jumal mustau hänen viäryön .
6 Luajikkua hänele muga , kui häi luadii muile , maksakkua hänele kahtu verdua enämbi hänen ruadolois . Sih mal՚l՚ah , kudamah häi muile juodavua luadii , luajikkua työ hänele kahtu kerdua kargiembi juomine .
7 Min häi otti ičele kunnivuo da eluo , sen verdu annakkua hänele tuskua da pahua mieldy . Häi sanou omas sydämes : "Minä istun tsaritsannu . En ole leski , engo nikonzu tiijusta gor՚ua "!8 Sendäh kerras yhtenny päivänny tullah hänele piäle nämä pahuot : surmu , itku da n՚älgy , i händy poltetah tuhkakse . Vägevy on Ižändy Jumal , kudai händy suudiu !
9 Muailman suarit , kudamat karrattih da elettih bohattuos hänenke , ruvetah itkemäh händy da tuskiččemahes , konzu nähtäh hänen tulirobl՚on savvu . 10 Hyö loitton seizotah varavon vallas hänen muokkien täh da sanotah : – A-voi-voi sinuu , suuri linnu , Vavilon , vägevy linnu – kui terväh tuli sinun piäle suudo !
11 Muailman kauppumiehet itkietäh da pačketah hänen täh , gu niken enämbi ei osta heijän tavaroi : 12 ni kuldua , ni hobjua , ni kallehii kivii , ni žemčugoi , ni hoikkua paltinua , ni purpurua , ni šulkuu , ni kumakkua , nimittumua hyväle tulijua puudu , ni slonan luus da kallehes puus luajittuloi veššilöi , ni bronzua , ni raudua , ni mruamorua , 13 ni koritsua , ni muudu mageitustu , ni hyväle tulijua pihkua , ni mirrua , ni luadanua ; eigo viinua , eigo voipuuvoidu , eigo hienuo jauhuo , eigo vil՚l՚ua , eigo sarvikarjua , eigo lambahii , eigo hebuo , eigo korjua , eigo orjua , eigo ristikanzan rungii eigo hengii .
14 – Sualehet , kudamii tahtoi sinun vačču , lähtiettih sinun käzis , hävii kai sinun kyllys da läpetys . Niilöi ei rodei nikonzu .
15 Kauppumiehet , kudamat myvväh nämii tavaroi , net , kudamat bohatuttih hänen periä , ruvetah seizomah loitton varavon vallas hänen muokkien täh . Hyö itkietäh da pačketah : 16 – A-voi-voi sinuu , suuri linnu ! Sinä šuoriit hoikkih pelvassobih , purpurah da kumakkah , sinä olet čomendettu kullal , kallehil kivil da žemčugoil . 17 Kui terväh hävii kai tämä bohatus ! I kai laivanpiälliköt da merel liikkujat , kai merimiehet da meren vuoh eläjät seizottih loitton , 18 i gu hyö nähtih , kui savvu nouzou hänen tulirobl՚os , hyö kirruttih : "Voinnusgo mih verrata tädä suurdu linnua "?
19 Hyö lykittih pölyy omih piälöih da kirruttih itkijen da tuskiten : A-voi-voi suurdu linnua , kudaman bohattuos bohatuttih kaikin , kel on laivua merel . Kui terväh se hävii !
20 No sinä , taivas , pie hyviä mieldy ! Piekkiä iluo , kai jumalanuskojat , apostolat da Jumalan iänenkandajat ! Jumal suudii sen linnan , kudai suudii teidy !
21 Yksi ylen vägevy anheli otti kiven , kudai oli suuren melliččykiven suurus , lykkäi sen mereh da sanoi : – Juuri nengomal väil huškatah iäre Vavilon , se suuri linnu , ei sidä löytä enämbiä nikonzu !
22 Ei sinun pihoil kuulta enämbiä ni arfan soittuo , ni pajuo , ni lirutin da torven iändy . Ei nähtä sinus enämbiä nimittuman ruavon ruadajua , ei kuulta enämbiä sinus jauhinkiven jyrinehty .
23 Ei nähtä sinus enämbiä lampan valgiedu , ei kuulta sinus enämbiä andilahan da sulhazen iändy . Sinun kauppumiehet oldih muan vägevimät , sinun tiedovoičendal muanitettih kaikkii rahvahii .
24 Sinun käit ollah jumalanuskojien da Hänen iänenkandajien veres , muailman kaikkien tapettuloin veres .
Vavilonan häviendy
Livvi
New written Livvic