Texts
Return to list | edit | delete | Create a new | history | Statistics | ? Help
Šeiččemen nälkävuotta
Šeiččemen nälkävuotta
Karelian Proper
New written karelian
Šeiččemen
vuuvven piäštä tuli nälkä koko muajilmah .Kaikista maista tuli rahvašta Jegiptih oštamah vil’l’ua Joosefilta , kumpasella oli šuurie vil’l’avaraštoja joka linnašša .
Kun hänen tuatto , Juakko , šai tietyä , jotta Jegiptissä oli vil’l’ua myötävänä , hiän työnši kymmenen poikuah šitä oštamah .Nuorimman poikah Veniaminin hiän jätti kotih .
Joosefi , kumpani oli Jegiptin halliččijana , möi vil’l’ua kaikilla ihmisillä .Šiitä hänen velletki tultih , kumarrettih muah hänen iessä ta kyšyttih vil’l’ua .Joosefi tunsi velleh , ka hyö ei tunnettu häntä .Šen jälkeh kun Joosefi oli myöty kauppiehilla , vellet ei oltu kuultu häneštä mitänä .Heilä ei ollun mimmoistakana tietuo šiitä , mitä hänellä oli tapahtun .
Joosefi heittäyty , jotta ei tunten vellijäh .Hiän šano heitä nuuškijiksi , kumpaset tultih tiijuštamah , mistä muah olis helpoin tunkeutuo .Vellet šanottih , jotta hyö ollah rehellisie miehie , kaikki šaman tuaton poikie .Heijän nuorin velleh jäi kotih ta yhtä vellie ei enämpi ole .A Joosefi pani heijät tyrmäh .Kolmen päivän piäštä Joosefi šano heilä : "Näin voitta tovistua , jotta pakajatta totta : Yksi teistä jiäy tänne tyrmäh .Työ loppuset šuatta männä ta viijä oššetut vil’l’at nälkähisillä perehillänä kotih .Tuokua šiitä nuorin vellenä miun luokši .Šillä keinoin tovissatta , jotta teijän pakinat ollah totta , eikä teijän pie kuolla ".
Vellet myönnyttih täh ta paistih keškenäh : "Täššä nyt meilä kurituš šiitä , mitä ruatoma meijän vellellä .Myö näkimä mimmoni hänellä oli hätä , kun hiän moli meiltä armuo , ka myö emmä kuunnellun häntä .Šentäh myö nyt joutuma täh kiipelih ".Vellet ei tiijetty , jotta Joosefi ymmärti heijän pakinat , šentäh kun hiän pakasi heilä tulkin kautti .Kun Joosefi kuuli nuo šanat , hiän läksi pois vellieh luota ta itki .Jälelläh tultuo hiän käški jättyä tyrmäh yhen heistä , Simeonin , a toisien šäkit käški täyttyä vil’l’alla ta piäštyä heijät mänömäh kotihis .
Šeiččemen nälkävuotta
Karelian Proper
New written karelian