Texts
Return to review | Return to list
Grigorii Makarov
history
June 03, 2025 in 15:47 Нина Шибанова
- created the comments: РУВИКИ: https://ru.ruwiki.ru/wiki/Макаров,_Григорий_Николаевич_(филолог)
- created the text translation
April 12, 2025 in 19:07 Нина Шибанова
- created the text
- created the text: Grigorii Nikolajevič Makarov (23.^ pakkaskuudu 1918 — 21.^ sulakuudu 1972) on nevvostolaine tiedomies, filolougientiedoloin kandiduattu, etnogruaffu, ven'a-karjalazen da karjal-ven'alazen (livvin murdehen) sanakniigan luadii. Eloskerdu Grigorii Makarov rodivui 23.^ pakkaskuudu Sammatuksen kyläs Anuksen ujezdas karjalazeh pereheh. Vuvvennu 1948 loppi Karjal-suomelazen valdivonyliopiston. Oli enzimäzenny sammatuksilazis, ken sai korgeiškolaopastuksen. Vuvvennu 1955 Makarov loppi Nevvostoliiton Tiedoakadiemien Karjal-suomelazen filiualan aspirantuuran Suomen kieli -opastusalan mugah. Vuvvennu 1958 puolisti filolougientiedoloin kandiduatan väitösruavon, sen tiemannu oli ven.^ «Именные (субстантивные) определительные словосочетания в финском литературном языке». Eri vuozinnu ruadoi opastajannu Kalininan alovehel, korjailijannu Punainen Karjala -lehten toimitukses. Vuvven 1955 talvikuul Grigorii Makarov tuli ruadoh Karjalan tiedokeskuksen Kielen, literatuuran da histourien instituuttah, enzimäi tiedosekretarikse, sit siirdyi kieliozastoh karjalan kielen tutkijakse. Hänen eloksenruavokse rodih oman karjalan kielen tutkimine. Grigorii Makarov pidi karjalan kielen kursiloi Petroskoin valdivonyliopistos suomen kielen da literatuuran ozastol. Bibliogruafii Grigorii Makarov kirjutti da piästi ilmah enämbän 30 ruaduo karjalan da suomen kieles, karjalazes folklouras. Häi on tiedokirjutuksien, kielinäyttehien, sananpolviloin da sananpiälöin kogomuksien, sanakniigoin luadijannu. Karjalan kielen livvin murdehen sanakniigu, kuduah on kerätty läs 20 tuhattu karjalankielisty sanua, on hänen suurimii ruadoloi. Se piästettih ilmah vuvvennu 1990, konzu Makarov oli jo kuolluh. Makarovan kuolendan jälles nägi päivänvalgien vie nelli kniigua, kudamien pohjannu on hänen kerätty materjualu.