Texts
Return to review | Return to list
Vepsäläzet: kandurahvahile uuttu tugie
history
May 21, 2025 in 10:59 Нина Шибанова
- created the text
- created the text: Ven’an haldivo hyväksyi Pohjazen, Siberin da Loittozen päivänlaskupuolen vähembistö-kandurahvahien pyzyvän kehityksen konseptsien vuodessah 2036. Tulien vuvven 1.^ pakkaskuudu Ven’al algavuu aktualiziiruitun Pohjazen, Siberin da Loittozen päivänlaskupuolen vähembistökandurahvahien pyzyvän kehityksen konseptsien vuodessah 2036 todevuttamine. Konseptsien piälimäzii tavoittehii ollah kandurahvahien ekonoumielline, sotsiualline da kul’tuurine kehittämine, perindöllizien eländypaikoin säilyttämine, perindöllizen eländytavan, talovuon, kul’tuuran kannattamine. – Olen sidä mieldy, ku konseptsien mugah luajittavan pluanan valmistamizeh pidäy yhtyö kaikil kandurahvahien alovehellizil ozastoloi. Ku kai pluanah pandavat pivot oldas kandurahvahien edustajien nevvostoloin hyväksytyt kui subjektan, mugai kylän tazol. Sen vuoh paikallizilgi herroil rodieu tärgei, ku net pivot oldas todevutettu. Nygöi, konzu federuallizel tazolpäi vepsäläzien sotsio-ekonoumizeh tugeh subsiidieloin kauti on nelläh kerdah vähembä varua da ei ole mahtuo kui enne todevuttua suurii projektoi, paikallizii pidoloi, uvvistetun konseptsien mugah luajitun pluanan pivot autetah meile kestiä vaigiet aijat, sanoi Oma Mediale Larisa Čirkova, Vepsänkul’tursebr-liiton piälikkö. Kandurahvahien perindöllizien eländykohtien säilyttämizeh kuuluu ekolougizen tilan silmäl pidämine da paikallizien eläjien mielen huomivoh ottamine infrastruktuuran projektoi todevuttajes. Kandurahvahien edustajii vältämättäh pidäy kuččuo yhteiskunnallizih šeikuičendoih da ekolougizih ekspertiizoih. Perindöllisty talovuttu da neroloi huavatah kannattua sen vuoh, ku kandurahvahile edusijahizesti annetah meččuičendu- da kalastustiloi. Mugažah ymbäristöh kuulutah välly piäzy internettah da hyvä yhtevys, meedikkuavun suandu, nygyaigazien školien, opastuskirjoin, uvven opastuslaittehiston olemas olendu, sego kandurahvahien kielien kannattamine. Konseptsien mugah pidäy auttua teatroi da kanzallizii pajo- da tansijoukkoloi, kuduat käytetäh kandurahvahien kielii, sego kannattua tiedotutkimuksii, kuduat koskietah kandurahvahii. Ven’an haldivo käski Kanzallizuksien azieloi valvojale federualuagentsvale da valdivoelimile kuvven kuun aloh valmistua pidoloin pluanu konseptsien mugah.