Texts

Return to review | Return to list

Piiplijan istorijoja kuuluu karjalakši

history

May 21, 2025 in 16:30 Нина Шибанова

• created the text
• created the text: Vuuvven 2022 talvikuušša alko projekti “Piiplijan audioistorijoja karjalan kielellä”. Nyt projekti on loppušuoralla, istorijat vienakši ta livviksi on nauhotettu. Vienakši Piiplijan istorijoja luki ta kerto omalla muamonkielellä Kalevalašta šyntysin karjalaini, teatterin ta lauluryhmän ohjuaja, kiäntäjä ta runoilija Valentina Saburova. A livviksi istorijan kertojina oltih Vieljärven eläjä, Itämeren-šuomelaisien kielien laitokšen piäštökäš Svetlana Jegorova ta Karjalan kielen kojin emäntä Nina Barmina. Kiäntäjie autettih kotikylissä eläjät karjalaiset, kellä karjalan kieli on muamonkieli. Vienakši on kiännetty ta nauhotettu 25 istorijua ta livviksi – 20. Istorijat annettih kuunneltavakši noin 20 karjalaisella, kumpaset ei ošallissuttu kiännökšeh, šekä tarkissettavakši teologiloilla, jotta audiot oltais šelvät ta kiännökšet oikiet. – Livviksi luajittih päinvaštani kiännöš, šiinä autettih Aunukšen karjalaiset, kumpasien kurattorina oli Tatjana Žarujeva. Apulaisie oli oikein äijä Vieljärveštä, Koivušeläštä, Kinnermäštä, Kuujärveštä, kerto projektin kurattori Anatolii Saveljev. Valentina Saburova on kiäntän monie spektaklija karjalakši ta kiäntämini on miellyttävä ruato hänellä. Tämän projektin aikana oli mukava tuaš ryhtyö toimeh, ka aihe oli aivan uuši. – Mie vain muutomašša päiväššä piätin ošallistuo projektih ta heti šuoriuvun Piiterih seminarih. Enšin oli oikein vaikie kiäntyä aivan uutta aihetta, ka še, jotta Uuši Šana on jo kiännetty ta še, jotta šai kyšyö apuo kielen tietäjältä Valentina Karakinalta ylen autto milma. Hil’l’akkaiseh rupesin ymmärtämäh ta ruato tuli yhä miellyttävämmäkši. Projektin kurattorit niise aina hyvämielisešti vaššattih kaikkih kyšymykših. Meilä oli seminarija Piiterissä, Komissa, Gruusijašša ta on arvokašta, jotta Kalevalaššaki oli. Projektijoukko näki meijän kaunehie paikkoja ta tuttavuštu istorijah, šano Valentina Kirillovna. Vienankarjalaisie starinoja šeuruau kantelen musiikki. Studijoh tuli šoittamah Kalevalašta šyntysin olija šoittaja, Petroskoin konservatorijan piäštökäš Tatjana Bel’ajeva. Piiplijan istorijoja niijen julkaisomisen jälkeh šuau kuunnella kannettavilla šoittimilla, mobiilišovellukšešša ta internetissä. Joka halukaš voit kuunnella audiokappalehie makšutta. Audiokappalehie valmissetah Piiplijan kiäntämisen tehtävä “Uiklif” -projektin rajoissa.