Texts
Return to list | edit | delete | Create a new | history | Statistics | ? Help
Sem’onov P’otr . Kyly
Sem’onov P’otr
Kyly
Livvi
New written Livvic
Sanotah
, buite Amerikas on ylen hyvät kylyt .
Ezimerkikse , amerikkalaine gu tulou kylyh , lykkiäy alussovat juaššiekkah da menöy pezemähes .Hänel ei ni mieleh tule buito sovat voijah kavota libo varrastua , ei ota ni sobalippustu , muga harpuau .Vai harvu hälykās amerikkalaine sanou toiči kylysruadajale :
Okei , sanou , ole hyvä , kačahtele .
Dai sit kai ...
Pezehes se amerikkalaine , tulou järilleh , a hänele annetah puhtahat alussovat , pestyt dai vualitut .Hattaratgi ollah lundu valgiembat .Kuadiet puutetut , paikatut .Toinah on elaigaine !
Ollahhäi meijängi kylyt kudakui .Ga pahembat .Ga pestäkseh voibi .Meijän kylylöis vai sobalippuzienke on ylen vaigei .
Mennyt suovattan lähtin kylyh (ethäi onnuako lähte Amerikkah ajamah !). Sie minule annettih kaksi sobalippustu :yksi alussovis , toine pal'tos da hatus .
Ga kunnebo alastoi ristikanzu vois panna kai lippuzet ?Oigieh sanuo , ei ole kunne panna .Kormaniloi eihäi ole .Ymbäri vai maha da jallat .Kukastu kummua niilöin sobalippuzienke !Ethäi pardah sivo .
Minä sivoin sobalippuzet kudamahgi jalgah , sit en kerras kaimua .Mugai menin kylyh .Vai sobalippuzet rämsetäh jalgoi vaste .On vaigei kävellä ...A kävellä se pidäy .Pidäyhäi löydiä luahkann'aine , kuibo muite pezetös .Mittuinebo pezemine on luahkann'attah ?Vai riähkävyt .
Ečin luahkann'ua .Kačon , yksi mies pezehes kolmes luahkann'azes .Yhtes seizou , toizes piälakkua muiluau , a kolmattu piettelöy hurual käil gu ken ei varrastas .
Minä tembain kolmanden luahkann'azen , tahtoin tiettäväine ottua sen ičelleni , a mies ei piästä .
- Sinä midäbo , sanou , — vierastu luahkannʼastu varrastelet ? Kačo gu loškuan luahkann'azel silmien välih ga et ihastu !
Minä vastain hänele :
- Ei ole tsuarin valdu luahkann'oil loškutella . Mittuine olet ičensuvaiččii .Pidäyhäi toizilgi pestäkseh .Ethäi ole teatras !
A mies punaldi tagapuolen minuhpäi da vai pezches .
Minä ajattelen : "Ethäi täs hänel ies rubie seizomah .Nygöi häi nareko rubieu pezemähes kolme päiviä ."
Menen ielleh .
Čuasun peräs kačon , yksi diädö haikostih da piästi luahkann'azen käis .Liennego muilua ottamah koverdunnehes vai lienne duumah iškenyh , en tiijä .Ga sen luahkann'azen minä otin ičelleni .Nygöi olis luahkann'aine ga eulo kunne istuakseh .A seizoi kuibo pezetös ?Vai riähkävät .
Olgah .Seizon , pien luahkann'ua käis da pezemös seizoi .
A ymbări , kukastu kummua , kaikin täyttyvägie pestäh sobii .Yksi pezōu štaniloi , toine kuadieloi , kolmas vie midă šelonou .Sanuo tottu , vai ehtit pestäkseh da jo uvvessah olet ligahine .Kehnolazet vie brizgutetah .Da moine humineh on sobien pezendäs , ga ei jo ni pestäkseh himoita .Yksikai ei kuulu , midä kohtua hierot muilal .Nengomas vai riähkih kavot !
- Mendähes mečäle ! duumaičen . - Pezemmös kois .
Menin kylyn senčoih .Yhtel lipul sain alussovat .Kačon , kai ollah minun , a štanit ei olla omat .
-Rahvas !sanoin .Minun štanilois loukko oli täs ,a nämis , kaččuot , kus on loukko !
Kylysruadai sih vastai :
Meidy ei ole pandu täh loukkoloi vardoiččemah .Emmohäi ole teatras , sanou .
Olgah .Panin jalgah nämä štanit , lähtin ottamah pal'tuo .A pal'tuo ei anneta - kyzytäh sobalippustu .A sen minä unohtin jalgah .Pidäy jaksuakseh .Heitin štanit , ečin sobalippustu sidä ei ole .Nuoraine sit on , jallas , a lippustu ei ole .Vezi pezi .Taričen kylysruadajale nuorastu , ga ei ota .
-Nuorazel , sanou , en anna .Nenga , sanou , jogahine voibi leikkuo nuorastu et suita sen verdua pal'tuo .Vuottele konzu kai rahvas lähtietäh , sit annan sen pal'ton mi jiännöy .
Minä sanoin hänele :
Vellimiehyt , a gu jiännöy migi ribušiišku ?Eihäi tämä ole teatru , sanon .Anna tunnuksii myö :yksi kormani on revinnyh , a tostu ei ole vouse .Mi koskeh nyblii ga sit ylembäine on , a alembazii älä ni eči .
Lopukse andoi .Eigo nuorastu ottanuh .
Minä šuorin da lähtin pihale .Sie kerras mustoitin : muilanhäi unohtin .Kiänyin järilleh ,a kylyh pal'tolois ei laskieta , sanotah :
-Jaksuattokseh !
Minä vastah :
Rahvas , en voi kolmattu kerdua jaksuakseh .Enhäi ole teatras .Ottazin parembi d'engannu .
Ei annettu .Ei annettu ga ei ni pie .Lähtin muilata .
Lugii , tiettäväine , voibi kyzyö :"Mibo kyly tämä on ? Kus se seizou ?Mibo on adressi ?.."
Mittuinebo kyly ?Ga kyly gu kyly .Yhten griunan kyly .
Kyly
Livvi
New written Livvic