Texts
Return to list | edit | delete | Create a new | history | Statistics | ? Help
Sem’onov P’otr . Voimattomat
Sem’onov P’otr
Voimattomat
Livvi
New written Livvic
Ei
, ei sua uskuo , buite ristikanzu rodihes oblezjanas .Vahnu ukko Darwin kielastaldi onnuako .
Ristikanzan ruavot , voibi sanuo , ollah ihan ristikanzallizet .Ei ole , näitgo , nimidä yhtenmostu elättilöinke .Gu elätit paistas mil tahto omal kielel , sit odva vai net maltettas paista sih luaduh kui minä kuulin ennegläi .
Sen paginan kuulin paranduskois , douhturin vastahotandal .Kävyn sie kerran nedälis syväintaudiloi hoidamas douhturi Opuškinan luo .Häi on hyva da pättävy mediekku .Kävyn hänellyö jo viijetty vuottu .Kai on hyvin , taudi ei mennyh pahembakse .
Ga sit tulin minä paranduskodih ,kirjuttiimmos vuoroh seiččemendenny .Minbo voit vuottua pidäy .
Istuimmos senčois divanale da vuotan .
Kuulen kui vuottajat voimattomat keskenäh taratetah .Paistah hil'l'azeh puoli-iäneh eigo ni torata .
Yksi vägi leveiroža diädö lyhyzis šuntilois sanoi rinnal istujale voimattomale :Voi hyvä mies , vambo sinul on voimatustyrä ?Sylgie da hieraldua sih lopeh sinun voimattomus .Minun rožah älä kačo . On se kaččuo pyöryžy ,a muite olen ylen voimatoi mies .Počkat ollah kibiet .
Rinnal istui mies sanoi abevuksis :
-Eihäi minul vai yksi tyrä ole .Kouhkoitgi ei olla tervehet .Da vie korvahgi pystäy .
Leveiroža sanoi :
-Midäbo sit .Vambo nämii läžindöi voibi panna počkien rinnale !
Silkeskie yksi vuoros istunnuh naine pehmies paikas sanoi irvistyksenke :
-Midäbo kummua niilöis počkis on .Minun vellen tyttärel oldih kibiet počkat .Rauhu dielo .Häi sobii ombeli dai silitti .A nengozien rožienke sinul ei ole midä varata .Täh taudih et voi kuolta .
Leveiroža vastah :
-Minägö en voi kuolta !Työ kuulittogo ?Häi sanoi , en voi kuolta täh voimattomuoh .Midäbo sinä ellendät , naine !Vie pidäy tungiekseh paranduspaginoih !Naine vastai :
Dovariššu , minä en alenda teijän voimattomuon vagavuttu .Se voimattomus on omaluaduine .Sen uskon .Ga sanon nenga sikse gu minun voimattomus on onnuako pahembi gu teijän net počkat .Minul on ruakku .
Leveiroža sanoi :
- Nu ga midäbo sit ruakku , ruakku . Vie pidäy kaččuo , mi ruakku .Eräs ruakku on ihan vahingotoi .Sit voibi puoles vuvves piästä .
Tämän oigiettoman korondan kuultuu naine valgeni da kai rubei särizemäh .Häi pračkäi käit da sanoi :
-Puoles vuvves !Kuulittogo ?En tiijä , kus sinä mostu ruakkua näit .Kačo mittumat rožat olet lihottanuh voimata olles !
Leveiroža tahtoi kaikel kunnivol vastata nengozeh alendukseh , ga sit vai viippai käil da kiändyi muijale .Yksi vuoros istujis muhahtih da sanoi sih :
-En ellendä , rahvas , midäbo työ täs löyhkättö ?
Voimattomat kačahtettihes sanojahpäi da ruvettih vaikkani vuottamah omua vuoruo .
Voimattomat
Livvi
New written Livvic