Texts

Return to review | Return to list

Valerii Žurban šuuri urheilumatka

history

June 18, 2025 in 14:37 Нина Шибанова

• created the text
• created the text: Koštamukšelaini Valerii Žurba ošallistu veteranien välisih Muailman kisoih, kumpaset oli pietty Taivanin Taibei-kaupunkissa oraškuun lopušša. Meijän omamualaini voitti hopie- ta pronssimetalit juokšuissa. Valerii kertou, jotta vielä 2024 vuotena hänellä šynty himo ošallistuo juuri näih kilpailuih, ka urheilij ie Venäjältä ei lašettu šinne. Kanšalaisjärještöjen kyšyntien anšijošta tänä vuotena oli järješšetty erillini rekisteröintä venäläisie urheilijie varoin. Näin ni alko Valerii Žurban šuuri urheilumatka Venäjältä Taivanih. Oraškuun 17.^ päivänä oltih Kisojen avajaiset. Ennein paratie ta avajaisie oli järješšetty Venäjältä tulluijen urheilijien vaštautumini. Valerin šanojen mukah še nošti joukon urheiluhenkie. Seremonija piettih Taipei Dome -paikašša. Katon alla olijalla stadionilla keräyty yli 18 tuhatta urheilijua, urheilun yštävyä ta kaččojua. – Lennon jälkeh oli viisi päivyä starttih šuaten. Še anto mahollisutta adaptoituo uuteh aikavyöh ta ilmaštoh (lämpötila oli yli 30 aštetta ta koštevuš 70–90%) šekä viettyä pari hyvyä harjotteluo varastadionilla. Kilpailujen alukši ei onnistun kehittyä hyvyä urheilukuntuo tervehyön vuokši, vaikka oliki hyvät mahollisuot harjotella manežissa, kerto Valerii Žurba. Enšimmäisenä starttina Valerii Žurballa oli 1500 metrini juokšu, kumpaseh ošallistu 16 henkie. – Kilpailun aikataulu ta järještelmä piteleyvyttih tarkkah šuunnitelmah: piäšyllä oli tarkaššuš: kačottih piikki- tahi juokšukenkie, annettih juokšuratanumeroja, šiitä meijät kaimattih starttih, ilmotettih juokšun ošallistujie ta myö tervehtimä kaččojie. Heti starttilaukaukšen jälkeh etehpäin juoksi viijen henken ryhmä, mie olin heijän kešen. Kakši pyöryä myö juoksima yheššä, šiitä yksi rupesi juokšomah rutompah, mie en juoššun hänen jälkeh. Taistelu toisešta ta kolmannešta paikašta oli viimesellä 200 metrillä, miula jäi voimie juošša rutompah ta piäššä toisella paikalla, kirjutti Karjalan etuštaja omalla šivulla sosialiverkošša. Šiitä Valerii ošallistu 800 metrin juokšuh. – Kakši finalijuokšuo oli, kun lämpötila ylitti 34 aštetta lämmintä varjošša. Kahen juokšun tulokšien mukah mie olin kolmantena. Voitti Sato Japanista. Lopun jälkeh myö šepäytymä ta muistelima 800 metrin juokšuo Turinissa, missä mie voitin. Mie šanoin: “Nyt olemma 1:1”. Hiän muhi miula ta šano, jotta näkeyvymmä vielä missänih muailmašša. Myö antoma toini toisella telefoninumerot ta nyt miula on kilpailija-yštävä Japanista. Šanakši, šeuruavat Kisat pietäh Japanin Kansai-kaupunkissa 2027. Vielä tahon mainita Tseren-urheilijua Mongolijašta, kumpani esiinty yli 90-vuotiset -ikäryhmäššä. Hiän on muailman kilpailujen voittaja ta ennätykšien tavottelija. Myö tuttavuštuma hänen ta hänen poikah kera ta šaima šuurie vaikutelmie hänen pikajuokšušta 90-vuotisena ollešša, šano Valerii. Venäjän joukko, kumpasešša oli 30 henkie, voitti Veteranien välisissä muailman kisoissa 34 kultaista, 16 hopieta ta 8 pronssista metalie.