Texts

UMBIKAIVO

June 18, 2025 in 16:13 Нина Шибанова

created the text
created the text: Istun ikkunpieles umbikaivo mieles ammuzen koin vieres turbien kuuzen tyves. Kuuzen oksal ripui aiven tuohilippi, joi sil vetty lippai juotatustu tirpai. Sit parzi vestetty, laučakse heitetty – n’uupoittai huogavo – lähekkäi vavarjo. Net kai oldih käin tiel, kus sai aigua viettiä. Šläntil laučal stokan viinutöytön tagan. Löydyy viinan juojua, olis gu vai tuojua. Silmät zel’l’al valau vuahtikeroi vajai. Aĳattomal aĳal pahus kubluh ajau, ottau hajun humal houkuttelutaval. Čäčätti harakku, vezi tules š’nuakku tädä tuohitöyttyy kagrupellon löydyö. Yhtel vyöl vyötetyt, čuhkehel syötetyt pyhävedoin hyövys nouzemale hovus. Ammuldua sai vetty ilmai tozieh tottu buito koivunmahlua hienuo aromuattua. Hiiristellen hizu, omil jalloil pyzyi, väzyksis, gu šliehku, savakonke lekui. Tiedy omua polgii valuta ei n’olgii, hos i šuštutti väit löntiändy sinnepäi. Sil pikoi takkaine, a olgupiät painoi. Laihal, gu pirran piil, eulluh piäs, eigo piäl. Ga puolenou syödäy dai ripsevyy piettäy suannuol lastu sängeh, vidivalgieh hangeh.