Texts
Return to review | Return to list
Rürik Loninan jubilejaks tehtihe ozuteluz
history
June 26, 2025 in 14:22 Нина Шибанова
- created the text
- created the text: Suomalaiž-ugrilaižes školas avaitihe “Rürik Lonin – vepsän rahvahan geroi” -ozuteluz, mitte om omištadud. Täl vodel täudub 95 vot Šoutjärven vepsläižen etnografižen muzejan tegijan sündundaspäi. – Lapsile ozuteluz om lujas mel’he. Eskai ezmäižen klassan openikoil, kudambad tuliba ozutelusen avaidusele, oli sur’ melentartuz’ Rahvahaližen muzejan pämehen Mihail Gol’denbergan starinaha. Lapsed tegiba küzundoid, sanuiba vepsäks erasid vaihid. Karjalan, vepsän da suomen keliden urokoil lapsed diskutiruiba ozuteluses opendajidenke, jagoihe ičeze tedoil Loninan kanzas, – sanui Suomalaiž-ugrilaižen školan pämez’ Natalja Barkalova. Nügüd’ lapsed läksiba kezapästusile, no ozuteluz avaidase udes 2.^ sügüz’kud. Ekspozicijas starinoičeba nored volont’orad, kudambad opendaba vepsän kel’t školas. – Minei ozuteluz toi vaiše pozitivižid melid. Minä tedan Rürik Loninan elon da muzeiradon istorijad, lujas kitän händast vepsän kul’turan muzejan tegemižes. Mugažo se om lujas tärged minun täht, sikš ku minun kanzas om vepsläižid jurid. Minun mamoi Valentina Mihailovna om sündunu da kazvanu Piterin agjan Podporožjen rajonas vepsläižes kanzas, – ližazi Natalja Barkalova. Ozutelusen radon aigan sidä voiba kacta Suomalaiž-ugrilaižen školan openikad da heiden kazvatajad, a mugažo lapsed, kudambad tuleskeleba adivoihe toižiš školišpäi. Möhemba ozutelusenke voiba tundištadas kaik tahthikad, sikš ku sid’ se jatktab ičeze matkad Karjaladme.