Texts

Metini löyly, šulkkuni vašta

July 17, 2025 in 16:53 Нина Шибанова

created the text
created the text: Vaššat ollah karjalaisien kylyritualin erikoini oša. Kešäpäi-vänšeisatušaikua – Lehti-Iivanan ta Petrunpäivän välistä aikua (07.–12.^ heinäkuuta) karjalaiset piettih šemmosena aikana, konša pitäy vaššakšet šuaha. Šitä ennein ei šuanun varpua veičellä katata. Vaššakšeh käytih vain kuivalla šiällä, jotta vähintäh kolme päivyä ennein lähtyö ei ois šatan vettä. Kun ei liene lähellä ollun lehtimeččie, lähettih vaššakšeh venehellä järven poikki. Šemmoseh šuureh hommah lähettih ušein joukolla. Rauvuškoivikko ečittih ta miehet kuattih koivuja, a naiset ta lapšet veiččien kera vaššakšie leikattih. Hikikoivu ei kelvannun vaššakšekši. A rauvuškoivun lehti on jäykempi, še kyllä pehmenöy kun talvella vaššan hauvot, vain še ei mäne litmakakši, eikä lehet lähe pois. Šentäh ni šanotah: “Rauvuškoivu – vaštakoivu, hikikoivu – lammaškoivu”. Šiitä kun koivu kuatah, okšie šuurih kerppuloih leikatah, mimmosen vain voipi kantua. No šiitä lähetäh kotih ta lat’atah vaššat.