Texts

“Tähkäine”: kymmenekse vuottu uuzi ozutelmu

August 04, 2025 in 15:34 Нина Шибанова

created the text
created the text: Tänä vuon Vieljärven karjalankieline Tähkäine-tyttiteatru täytti 10 vuottu. Roindupäiväkse kezäl piettih ozutelman enzi-ildu. Sen nimi on “Häkkine – tervattu bokkaine”. Tädä ozutelmua varustimmo ylen hätken, enzimäi pidi kiändiä tekstu karjalan kielele. Minä otin Oles’a Jemeljanovan pjesan ven’an kielel da rubein kiändämäh, ruaduo oli äĳy. Sit harjoittelimmo lapsienke, enzimäi opastuimmo hyvin lugemah tekstua. Minule avvutti Boris Kudr’avtsev, häi avvutti muuzikan puoles, nevvoi, midä vallita pädöy ihan täh spektaklih, erähii tyttilöi häi andoi Čičiliušku-tyttiteatraspäi, erähii myö lapsien vahnembienke luajimmo iče. Tiettäväine, spektaklin luajindah pidäy olla erilastu neruo. Hyvä on, konzu on kel avvuttua. Minun oma ukkogi ei bokkah jiännyh, häkkizen puuhizen azui, stolan da vie kuda-midä kohendi. Konzu rubein duumaimah tädä ozutelmua, tahtoin, gu sie olis midägi karjalastu, myö lapsienke spektaklin lopus pläšiimmö karjalastu tansii da vie meile oldih karjalazet ruutat, kudamis pidäy sanuo suuret passibot Margarita Kemppazele. Sanon suuret passibot kaikile, ket yhtyttih uvven ozutelman luajindah, kaikile artistoile, abuniekoile, Karjalan Kielen Koile.