Texts

Return to review | Return to list

Kalagen školas avaitihe Anna Lisicinan muštčogaine

history

August 05, 2025 in 16:22 Нина Шибанова

• created the text
• created the text: Nor’ neižne, tedištelii, partizan, Sovetskijan Sojuzan geroi Anna Mihailovna Lisicina tegi suren panendan vägestusehe Sures Kodiman voinas. Miše igästoitta gerojan nimed, Kalagen školas udištadihe muštčogaine. Anna Lisicina oli vepsläine, hän eli Kalages. Augotižškolan Anna lopi Kalages, jäl’ges openzihe Šoutjärves, a sid’ – Kirjišton tehnikumas Leningradas. Möhemba Anna radoi Segežas, kus händast sabuti-ki voin, lopi tedišteluzškolan Belomorskan agjas i tegihe partizanaks. Ühtes sebranikanke Maria Melentjevanke hö tegiba tärktan vointegendan, miččen aigan Anna upsi Süvär’-joges anttes kaik azjbumagad Mariale. Nece oli hänen melekaz i rohked pätuz. Anna Lisicinan sures tegos voib starinoita läz kaikutte vepsän man eläi. Om tärged, miše lapsed tedaižiba ičeze kodiröunan gerojid. Kalagen školas kaikuččen voden tehtas erazvuiččid azjtegoid Anna Lisicinan muštoks, openikoile starinoitas hänen elos da sures panendas vägestusehe Sures Kodiman voinas. Necil vodel školas udištadihe Anna Lisicinan muštčogaine Karjalan Rahvahaližen da regionaližen politikan ministerstvan rahatugel, miše igästoitta voinan gerojan nimed. Muštčogaižen avaiduz oli kezakus, konz školas radoi “Päiväine”-lager’ lapsiden täht. – Biznesmez’ Dmitrii Gladišev vaumišti kaludišton meiden muštčogaižen täht, a Anna Lisicinan heimolaižed andoiba hänen matematikan škollehtikon suomen kelel kaičemha Kalagen školha. Avaidusel minä starinoičin lapsile Anna Lisicinan urohontegos, lapsed andoiba küzundoid, tegihe läm’ pagin. Mö olem hüviš meliš, miše ozastui udištada necen muštčogaižen, – sanub školan pämez’ Svetlana Gotič. Muštčogaižen avaiduz andab Änižröunan školiden openikoile voimusen süvemba tundištadas Anna Lisicinan elonke da urohontegonke, rižada aigoiden sidod. Sigä voib kacta harvinaižid fotokuvid kanzan arhivaspäi, azjbumagoid da löuta tarbhaižid tedoid Anna Lisicinan polhe.