Texts
Return to review | Return to list
Vasilii Rigonin ei issu kiät rississä
history
August 06, 2025 in 15:41 Нина Шибанова
- created the text
- created the text: Seesjärven karjalaini Vasilii Rigonin on šyntyn Šärkijärven kyläššä, kumpani šijottuu Šalgovuaran pos’olkan lähellä. Nuorena hiän lopetti 16.^ Segežan teknillisen opiston ta šai šorvarin ammatin. Vasilii ruato Segežan sellulosi- ta paperikombinatissa, oli armeijašša Viipurissa ta vielä muutoman vuuvven ruato šamašša kombinatissa. Vuotena 1992 Vasilii piätti piäššä ruatamah junaremonttiašemalla. Enšin hiän ajo kuormajunie lämpöveturinajajan apulaisena. A yhekšän vuuvven piäštä hänellä ehotettih ajua veturie. Mieš vielä muistau omua enšimmäistä juohattajua, junanajajua Anatolii Pugačie, kotikyläläistä. Šamoin Vasilii muistau Dmitrii Čertkovie, kumpani opašti hänellä junanajajan ammattie. Konša Karhumäjen ašemalla tuli šähkötyš, Vasilii Ivanovič alko ajua junie šähkövoimalla Kemih šuaten. Ajan mittah hänellä luotettih matkuajakuletukšie. Hänen juohattajina oltih junanajajat Andrei Goloktejev, Jurii Koviršin ta Aleksei Jakovlev. – Matkojen aikana šattu kaikenmoista, šanou Vasilii Ivanovič. – Onnekši šähköveturit rikkauvuttih vähäarvosešti, ta mie ičen pärjäsin. Olen kokenut junanajaja. Šain junan ohjuamisen toisen luokan vielä vuotena 2011. Omašta ruatotoiminnašta Vasilii Rigonin šai Okt’abr’skaja-rautatien vetovoiman johtokunnan ušeita kiitollisukšie, virašton kakši rintamerkkie. Šamoin hänen nimi on kirjutettu junaremonttiašeman kunnivotauluh. Vuotena 2024 Vasilii Rigonin šai viimesen palkinnon, Venäjän rautateijen vetovoiman johtokunnan paraš juohattaja -rintamerkin. Mieš valmisti yli kymmenen nuorta junanajajua, kumpaset nyt šujuvašti ruatah omalla alalla. Ottuan huomijoh tuotannon vahinkuo junanajajat jiähäh eläkkehellä 50-vuotisina. Vasilii Rigonin ruato 5,5 vuotta enemmän. Oman viime reissušša hiän ajo 2.^ Moskova – Murmansk -matkuajajunan Syväri-ašemalta Karhumäki-ašemalla. Junaremonttiašeman ruatajat juhlallisešti otettih vaštah oma työtoveri. Hyö avomielisešti kiitettih mieštä ruavošta, annettih lahjoja. Vasilii Ivanovič niise kiitti kollegoja. Onnakko Vasilii Ivanovič oli eläkkehellä vain kuukauven aikana. Nyt hiän uuvveštah ruatau junanajajana Karhumäješšä olijašša graniittimurutehtahašša.