Texts
Return to list | edit | delete | Create a new | history | Statistics | ? Help
Sem’onov P’otr . Nouzemat
Sem’onov P’otr
Nouzemat
Livvi
New written Livvic
Silaigua
päiväine nouzou vie ylembäkse taivahah .Kaste kuivau i heinät kovetah gu ravvat .Ielleh niittiä vai stoikkua tyl'čendiä .Tuattah seizatteleh da kaččou niitettylöi heinii on jo vägitukku .Kaččou pil'čistäy taivahahpäi - se on pohjatoi , sinine da puhtas .Häi hil'l'azeh koverdah , ottau kobran heiniä da pyhkiy stoikan .Levielöil askelil harpailou heinyluogolois piäliči kodahpäi .Stoikan riputtau kuuzen oksale , ottau čainiekan da astuu joven randah .
- Ammulda vetty sie , ylembi , tuattah sanou väzynyöl iänel da muheloittau , iče kualau vedeh sovissah - paidu on suuril muzavil higitačmoil .
-Oh-ho !kirguu häi da uidau čukelduksis vastaizeh randassah , vezivandehet levitäh kaikkielpäi kaijan joven pindua myö .Tuattah kublastihes da uidau ruttozil sylyzil , joga käin viuhkuandal punaldau piädy se yhteh , se toizeh čurah .Toven , sit ei ole kunne äijäl uidua , häi terväh nouzou rannale , hänen kai rungu on veziojazil gu vienižändäl .
Tulirobl'on virittäjes tuattah n'evvoi poijale :
— Kiško vähäine tuohtu .Spičku pidäy nenga virittiä . Nenga , anna tänne . Spičku pidäy virittiä tälleh : peitä tuulespäi , muga ... hyvä .Panemmo kuivua havuu , a nygöi parembua halgostu , vot moločču !
Poigu hiestyy raden'n'an periä , muga avvuttau tuatale puhuo tuleh .Päiväzen sädehis valgei tuli ruttoh sytyttäy havvut da järiembät oksat , nuolou čainiekan savustunnuloi bokkii .
Tuatto riputti oksile štanit da paijan i istuu nygöi mustis lyhyzis štanizis .Hänen rungu on ruskei gu vaski , a jallat ollah valgiet .Häi on muanruadajis lähtenyh , a hyö ei malteta päivittyö .Konzugi jaksetahes pellol , ga vai vyössäh .
Rodi andau syömizet kovaspäi .
Tuatan saldatanaigazes brezentyhuavos löydyy havvottuu lihua , leibiä , voidu , čuajuu .Iččehluajittu suomenveičči kebjiesti , gu bumuagan , leikkuau ravvan .Havvottu liha pannah hiilile da zavaritah čuaju .Nenäh tulou magiel pastetul lihal .Harmai razvu sulau , magiesti šuhizou da imevyy lihapalazih , roihes puhtas gu vezi .
Rubieu havaččumah nälgy da imemäh rynnäslastun ual .Rodi lainoilou n'olgii , ga tirpau da kaččou tuattahpäi , kudai hil'l'akkazeh leikkuau leibiä .Leivän leikates tuattah n'evvou :
- Leibiä leikates sidä ei pie pidiä ryndästy vaste , eiga voibi satattua ryndähän , a vot nenga stolale panduu - se on kaikkii paras . Tuatal ongi sit stola , lavvas vestetty da katettu valgiel puhtahal ribuzel .
- Ota , sanou tuattah , iče lähendäy poigahpäi lihat da leivän ,syö kylläl . Rodi ei voi tirpua , huigiettah tungou tävven suun leibiä - muga äijän , ga kai ei voi haukata vihandua laukkuheinästy .
- Kačo , älä vai lökästy ! nagrau tuattah .
Iče häi ei kiirehtä syvvä .Enzimäi valau ičelleh čuajuu vihandah poluudittuh kuppih , lykkiäy sinne harmuan hallatun zuaharipalan da hil'l'azeh šelou koivuzel oksazel .Muga äijäl puhuu kuppih , ga kai čuajuallot läikytäh piäliči laijas .Iče varovazesti yksil huulil vedäy suuh hiilavua juomistu .Lainovuksien keskes tuattah panou kupin muale da tarkah kaččou loitokse joven tuakse .
Rodi sežo kaččou sinne , ga ei näi nimidä , vai tämänmoizen niitun , kui täs , da mustottavan meččyreunan .
-Et toizin sano , vagavasti sanou tuattah , - vezi tiä on puhtas .A vot meijän Slepn'evas oli kolme nouzemua .Vot kus oli vezi , minä sinule sanon !Ga mida "oli ", tostahes tuattah , net nygöigi ollah , pidäs olla .Vot lähtemmö Vologdah , minä vältämättäh vietän sinuu niilöin luo , opit sidä vettä .Ennevahnas niilöin nouzemoin luo käydih vai muga - illoil vetty kuundelemah .Minägi silloi brihačunnu käväin .Minun tuatto , a sinun died'oi Osippu , voinale otandua vaste hyvästelih niilöin nouzemoinke , dai ei yksi häi .
- Tata , olitgo sinä silloi samanigäine kui minä nygöi ? kyzyi Rodi . - Ga en , tiettäväine , suurembi olin , vastai tuattah .
- Konzubo myö lähtemmö sinne ? Sinä ainos vai uskaldat , uskaldat ... abevui Rodi .
- Ičehäi näit , ainos ruaduo on . Tulien kezän ajelemmo .Enne školua , uskaldi tuattah .- Kačo , älä vai kielasta .
No , sid näit !
Vilustunnuon čuajun juoduu , tuatto nosti mit lienne tundemattomat , ruskiel losnijat pallozet .
- Ota vai , syö . Nämät ollah pomidorat niis on tervehyöle ylen pättävät vitaminat !Myö muamas kel , silloi vaste vai tunnustiimmokseh , näimmö niilöi bazaril .Pidäy oppie , duumaičimmo .Rubeimmo syömäh , ga ei mendy mieldy myö .Annoimmo ilmai ihan tundemattomale mužikale .A niidy pidäy syvvä suolan da leivänke , häi lekahutti piäl , - vot oliimmo mittumat mielettömät , mollei kyläläzet , minä da häi — ihan yhtenmoizet .Muga , kačo ...
-Net ollah liijan libiet , sanoi Rodi .Jokse ! diivihes tuattah .
Mindäh ollou , ei himoita , jatkoi Rodi .
Syö , mieletöi .Minähäi sanoin , se on ylen pättävä tervehyöh näh .Eiga , kačo , kazvat ebävoivazennu , ni armieh ei oteta .
-Ga minä jo söimmös , täpyttäy Rodi vaččua , jo kai rodih uni .- Nu ga sit tungei kodah , tuattah andau vallan . Häi kattau poijan jallat omal pinžakol da menöy šelomah heinii .
Nouzemat
Livvi
New written Livvic
—
Кибирь Василий
Родники
Russian
—