Texts
Return to list | edit | delete | Create a new | history | Statistics | ? Help
Sem’onov P’otr . Vuonaine
Sem’onov P’otr
Vuonaine
Livvi
New written Livvic
Konzu
Mus'ka sai tyttäryön , Rodi erähäkse aigua kai unohti Žen'kan joukon .Hyö Veranke čuassuluguh häihitettih pikkarastu vuonastu .Kozaine kai oli valgei , vai selläl mustotti yksi tačmaine .
Kaikis čomimat oldih pikkarazet ruspakot kabjazet , kudamat puaksuzeh kapitettih aidazen latettu myö .Konzu vuonaine bliämičči , avavui ruskei suuhut väbizijän kielyönke sydämes .Se imi sormie gu muamah n'ännii .Tiettäväine , lapset da vuonaine ylen hyvin tutustuttih .
Mus'ka otti vastah sen tutustundan myödymielizesti .Se väzynyösti salbaili luomii da rounu sanoi : elostakkua , lapset , elostakkua .Elaigu ei ole udarehien pehmevys da ei kai ole maijon magevus .
-Be-ee-e , hienol iänel vieldi vuonaine , rounu vastai : se ei ole meijän huoli .Vuonaine ruttoh potkastelih tagajalloil da juoksendeli ahtahas aidazes nagrajien lapsien ies .Sil himoitti teriämbi piästä välläle sinne , kus loitton nägyi vihandu niittu , jogi pagei ihastuttajan šolizuksen da läikkehen kel , kus läbi puuloin ladvois pastoi päiväine .Elaigu toi läikkäjän meren iändy , äijän kaikenmostu hajuu , mujuu , kudamat sytytettih da nostatettih vaste vai pilkettäjän mielen .
Silkeskie rämähtih römäkkö raudu , kuului valujan vien humineh - onnuako , se ižändy lypsäy puuhistu kozua raudazien udarehienke - käziastettu .A nygöi helizöy hienombah , pitkäh radžizou tahnuon veräise emändy menöy .Häi istuhes madalale skamn'azele da algau tovelleh lypsiä .Enzimäzet maidovirdazet kirvotah lypsinrengin pohjale helizyksen kel .Sen jälles virdazet vilahtellahes puaksumbah , muututah suurembikse , vuahtenke upotah maijole sydämeh toizen luaduzen iänenke .Lypsändän jälles Mus'kan luo laskietah pikkarastu kozastu .Tervah tulou iče pieni ižändy .
Tänäpäi häi on ylen vagavu , kai buurakko .Jälgiperäh muamah andoi vallan viettiä vuonazen niittuzele .Rodi kodvan azettelou kagluremenii järies nahkas , sidou sih nuorastu .Vera tirpamata riuhtou händy hiemuas :
- Jogo sinä terväh ?
- Terväh , vastuau Rodi .
Lopukse hyö mennäh tahnuospäi pihale .Sie heis ymbäri kerävytäh lapset .Heijän keskes puneloittau Vit'ka Fisenkov rinnaleläjän feršalin poigu .Hänele on kielty kävellä Žen'kan joukos , ga vambo menet siiriči nengomas kerras !Lenaine sežo on sit , ga Rodi händy ei ni näi .A kuibo muite !Niilöin zuavessizien täh Rodile kačo kui puutui , a häi ...Kuundeli omiiheitti kävelendän hänen kel !Nygöi anna kadehtiu - ičelleh eihäi ole nengomua kozastu da vie nengomua vahnembua sizärdy .Näit kui !
- Anna silitän ! Lenaine varatessah oijendau käin .- Nu anna , žiäligö sinul vikse on ?
Ei , Rodi ei voi kieldiä toizilgi olla ihastuksis , konzu hänel on nengoine ilo .- Silitäkkiä , minul ei ole žiäli , häi hyvämielizesti andau vallan .
- Läkkiä yhtes händy paimendamah ! kirrutah lapset .
- Läkkiä , sobiu Rodi .
Tottu , niitul ongi ylen hyvä .Vuonaine hypästeleh da ihasteleh puhtastu tuuluttu da lagevuttu .Lapset juoksendellah jälles , ga heile terväh se vaivavuttau .On räkki i himoittau kezoile .
- Läkkiä jovele ! käsköy Žen'ka .- A vuonaine voibi siduo kytkyöh — ei kunne mene , anna syöy heiniä .
Rodi iški muah seibähäzen , sivoldi sih nuorazen da juoksi toizile lapsile jälgeh .Kiini puuttuhuu vuonaine opii piästä välläle .Sidä rubei ylen äijäl juotattamah .Vuonaine riuhtaldi nuorastu iččehpäi - tahtoi piästä sinne , kus vezi čurčetti .Liikutettu seibähäine kuadui , vuonaine hypästelih kodvazen da sit lähti jogehpäi , nuorastu ribaitti peräs .
-Brihačut , tavakkua !kirgai Vera .
-Azetu !Tabua !Pietä !Ymbäröikkiä !
Kai lapsijoukko ruttoh muutui kozazen tabuajakse .Žen'ka tungeldi sormet suuh da rubei täytty vägie viheldämäh .Vuonaine täytty hyppyy ryömästih pagoh .
Silkeskie muamo rubei huolevumah da kaččelemah ikkunah - Rodii da Verua ei nägynyh nikus .Huondeksespäi muamah oli hyväs mieles .Vera jo toizen nedälin on adʼvois .Hyö käydih marjah , ruattih kodiruadoloi .Kui oli uskaldettu baboile , muamo ei paissuh liigua , a tuattah Veran kel oli rauhasti , ei eroitannuh poigua .Murgin jo rubei vilustumah , a poigua da tytärdy ei vie nävy .Muamo tuskevuksis meni pordahile da rubei kaččomah loitombakse alači kämmenes , gu päiväine silmih ei pastas .Mečän reunas ozuttihes lapsijoukko .Iespäi astui Rodi .Hänen käzil virui vuonaine .
- Onnuako tapahtui milienne , burahtih muamo ,- pidihäi minul piästiä vuonaine heijän kel ! Lähtenengo vastah , mibo sie ehtii , kukastu kummua .
Muamo heityi pordahis da meni pihaveriän tuakse .
- Myö tahtoimmo sen tavata , lapset ruvettih mäčättämäh ,—a se pagei meččäh da kirboi haudah , iče on viäry . Onnuako , sil on selgypii katkennuh !Nygöi kaikin saneltih , kiistai šliehkutettih käzii , vai Rodi vaikkani itki pietellen kozastu käzis .
- Sit nygöi puutui elostua ! Mugai minä tiezin hyvälleh se ei loppei .Muamah jo ečii viččua aijan vieres .Tuattas gu tulou ruavos , sit sellitäkkiä kui maltatto , muamah viippai käil ,-kozua vai älgiä koskekkua da tulgua syömäh .
Rodi ei lähtenyh syömäh .Häi vieri vuonazen rinnale vačalleh , sydäili sen turbazen uale veresty vetty , maiduo , ga se ei ottanuh nimidä .
Illal tuattah tuli kodih .Istuihes vuonazen tyveh , hil'l'azeh lekahutti selgästy .- Tata , kuččuzitgo feršalin ..? kyzyi Rodi .
-Täs ei rodei eläjiä , nägyy feršalita .Vai sudre rubieu muokkuamahes , tuattah vastai lyhyösti , meni saruah ottamah kovazindu da iččehluajittuu suomen - veiččie .Tuli Vera da otti Rodin kodih .Häi ei väčkänyh eigo itkenyh , ga astui hil'l'akkazeh da vaikkani , vai rožazet mustettih da kovettih .
Vuonaine
Livvi
New written Livvic
-