Texts
Return to list | edit | delete | Create a new | history | Statistics | ? Help
Sem’onov P’otr . Harmai jänöi
Sem’onov P’otr
Harmai jänöi
Livvi
New written Livvic
Harmai
jänöi talvel eli kylän vieres .Konzu tuli yö , se nosti yhten korvan , kuundeli .Sit nosti toizen korvan , lekutti usii , n’uustaldi ilmua da istuihes tagakäbälile .Sit se kerran-toizen hyppäi syväs lumes da uvvessah istuihes tagakäbälile da rubei kaččelemahes .
Nikuspäi ei nägynyh nimidä , paiči lundu .Lumi oli aldoloilleh da läpetti gu zuahari .Jänöin piäl oli kylmy höyry da sit höyrys läbi nävyttih suuret räškäjät tiähtet .
Jänöile pidi piästä poikki suures ties , gu puuttuo tuttavah riiheh .Suurel tiel kuuluttih : jallaksien vingeh , regilöis miäliččöin kridžineh .
Jänöi myös azetui tien vieren .Mužikat astuttih regilöin peräs kauhtanois kaglukset nostetut .Heijän rožat vähäl nävyttih .Heijän parrat , usat da ripsit oldih valgiet .Heijän suulois da nenis lähti höyry .Heijän hevot oldih hies da higeh tartui udžve .Hevot ähkittihes längilöis , čukeldeltihes da kublasteltihes kivoksis .Mužikat tabailtih , toine tostu jätettih jällele da perrettih plettilöil heboloi .Kaksi ukkuo astuttih rinnakkai da yksi saneli toizele , kui hänel varrastettih hebo .
Konzu riet ajettih siiriči , jänöi juokseldi poikki ties da hil’l’akkazin meni riihehpäi .Koiraine nägi jänöin .Se rubei haukkumah da hyppäi jänöile jälgeh .Jänöi juoksi riihehpäi hangie myö .Jänöidy hangi kesti , a koiru kymmenendel hypästyksel uppoi lumeh da azetui .
Sit jänöigi azetui , istui tagakäbälli kodvazen da hil’l’akkazeh lähti riihehpäi .Matkai vihandeksil se vastai kaksi jänöidy .Net syödih da kižattih .Jänöi kižai dovarišoin kel , niilöinke kaivoi kylmiä lundu , söi vihandestu da lähti ielleh .Kylläs kai oli hil’l’u , tulet oldih sammutettu .Vaiku lapsen itku kuului pertin seinis läbi da pakkazen radžu kodiloin seinis .
Jänöi meni riihen tyveh da sie löydi dovariššoi .Se kižai heijän kel puhtahas saruas , söi kagrua vajuas astiespäi , lumehistu levuo myö meni liyhtehien kuivattavah huoneheh da läbi oksis punotus aijas meni järilleh iččeh rotkoh .
Päivännouzučuras jo ruskoitti , tiähite rodih vähembi da vie sagiembi kylmy hauru nouzi muan piäl .Lähimäzes kyläs havačuttih akat da astuttih viele .Mužikat kannettih syömisty riihispäi , lapset ravistih da itkiettih .Tiedy myö meni vie enämbi regie , mužikat paistih vie raviembah .
Jänöi hypii poikki ties , meni iččeh vahnan pezän tyveh , löydi korgiemban kohtan , töngii lundu , vieri sellin uudeh pezäh , sijoitti korvat selläle da uinoi silmät avvoi .
Harmai jänöi
Livvi
New written Livvic