Texts

Return to review | Return to list

Vuonnisešša vietettih mierolaisien pruasniekka

history

August 28, 2025 in 15:04 Нина Шибанова

• created the text
• created the text: Joka vuosi 14.^ elokuuta Vuonnisen runokylän časoun’ašša ristikanša viettäy Makovei-veikkojen muisson päivyä. Kiriköššä muissellah ta kunnivoitetah šeiččemen pyhyä Makoveita, heijän muamuoh Solomonijua ta opaštajuah Jeleazarie, kumpaset ei kieltäyvytty omašta ušošta, vaikka šen takie heijät tapettih. Šamana päivänä vietetäh mesi- ta marjaspuassuo. Juhlapäivänä Kalevalan Petrin ta Puavilan kirikön pappi Jevgenii Korenev piti časoun’ašša Jumalanpalveluo. Seremonijan lopušša Ylä-Kuittijärven rannalla piettih kellojen pruasniekkašoitanta, a vierahie kostitettih samovuarašša keitetyllä čäijyllä karjalaisien sriäpnöjen kera. Kalevalan kirikön šeurakunta kiittäy Vuonnisen eläjie lämpimäštä vaštahotošta. On tärkie, jotta vanha karjalaini kylä kannattau ta šäilyttäy omie perintehie. Vuonnisen časoun’a Ainutluatuni Vuonnisen časoun’a rakennettih uuvveštah talvella 2012–2013 Into Konrad Inhan vuotena 1894 otetun valokuvan mukah. Kalevalan laulumailta -kirjah Inha lisäsi šeuruavan kommentin časoun’an valokuvah: “Tämä pieni časoun’a oli kuin vertauškuva koko tämän muan nykyseštä henkenviljelykšešta...” Nämä šanat ollah epäoikeuvenmukasie, šentäh kun 1890-luvun puolivälissä kylän keškiošah rakennettih šeurakunnan kirikkö, kummaista Inha ei kuvannun. 14.^ elokuuta 2013 Kalevalan Petrin ta Puavilan kirikön pappi Jevgenii Korenev pyhitti Vuonnisen uuvven časoun’an. Vuotena 2019 časoun’ua varoin Jaroslavlin alovehen Tutajevon kaupunkissa oli valettu kellot. Šaman vuuvven 14.^ elokuuta kellot pyhitettih ta Vuonnini tuaš kuuli kellojen šoittuo. Vuotena 2020 časoun’ašša pyhitettih Pyhien Makovein oprasa, kumpani oli mualattu Stroičča-Sergejevin manasterissa. Merkittävä tapahtuma tapahtu tänäki kešänä – 13.^ kešäkuuta vietettih enšimmäini venččäytymini. Joka kešä Jyrkkilän termällä Vuonnisen rahvaš pitäy supotniekkua. Tänä vuotena Vuonnisen TOSin Vuonnisen Jyrkkilän termän kunnoššuš -projekti piäsi voittajien lukuh. Časoun’an rakentamisen jälkeh kunnoššušruavot jatutah ta polku šen luokše ei kašva umpeh.