Texts
Return to list | edit | delete | Create a new | history | Statistics | ? Help
Nina Zaiceva. Sit' - sarnaline jogi
Nina Zaiceva
Sit' - sarnaline jogi
Veps
New written Veps
Kaikuččen
kerdan , konz oli poud , Vas’ka meleti , miše muga linneb hätken .No mäni kuverz’-se aigad , i ön aigan sä oli vajehtanus .Ehtal oli hil’l’ i läm’ , a öl libui tullei , homendesel taivaz oli mustiš vihmpil’viš .
Homendesel vihmuškanzi kuti kauhaspäi .Rugižpöud oli kuti aldoikaz meri : tullei rebiti i pudišti varzid , murenzi tähkid , a ülähänpäi valoi vet .
– Naku rad-ki meiden lopihe , – hengahti Prokatov .
Hän opalas kacui , kut hänen sil’miš nece čoma kuldasine rugiž surmitadihe .I nece om tehnus muga , sikš ku ken-se ei ehtind koheta kombainad , ei ehtind aigalaze .
– Mušta , Vasilii , midä tegeb sä meiden leibäle ,– sanui hän kovas . – Huvä om miše mö tulim i rahnoim nel’l’kümne gektarad , a muite ka kaik koliži pöudol .
Vas’ka kacui , kut tullei i vihm murendaba rugižpöudon , i se väzund i jüged rad jo ei olnugoi mugoižin . Ned ozutiba , miše kaik ei olend hödhüvin .Hänele tegihe kuti huiged ičeze vällüdes , konz hän Tan’aižen tagut tahtoi jäda kodihe .Nügüd’ hän ei voind ani kacuhtada Prokatovaha , kuti oli vär neciš pahas säs .
Prokatov ühtnägoi küzui :
– Konz Tan’aine-se lähteb ?
– En teda . Tedan kahtendelkümnendel kahesandel päiväl .
– A tämbei om kahtenz’kümnenz’ videnz’päiv ...
–Ka muga .
– Näged , kut azjad-se kändihe ... Lähtkam faterale da kuivahtagam sobid .Void mända kodihe .
– Ik kodihe ? A sinä-k ?
– A midä minä ? Varastaškanden , konz vihm lopiše i voib jatkata radod .Midä-ni jäb rugihen-ki tähkihe .
– En . Minä jän sinunke .
– Melehta ! Nügüd’ tuleb mugoine aig , konz ed voi äjan sada dengoid .Tahtoin , miše sinun muštho jäižiba parahimad aigad .
Vas’ka sanui :
– Voib olda , homnehesai sä ladiše .
Prokatov opalahašti muhazi :
– En meleta !Vezi , miččele tarbiž valadas taivhaspäi , se tuleb maha .Üht päiväd ei täudu .Astkam , rata nügüd’ ei voi .Ku oliži motocikl , ka minä-ki ajaižin sinunke .– Ku lähten kodihe , ka mikš kuivatas , – sanui Vas’ka el’getes , miše Prokatov päti jämha üksnäz .
– Kacu , ku ed varaida sulada , ka mäne nügüd’ . No minä tahtoižin völ sinei sanuda :muštad-ik meiden ezmäižen paginan ,konz pagižim enččes brigadiras Aks’onovas .Sinä siloi mindai muga abidid !Kut sinä siloi sanuid : olet aigvoččed , a et mahtkoi necidä jomarid opendamha !Minä en pagižend sinunke neciš aigemba , sikš ku meletin , miše sinä mindai ed el’genda .A nügüd’ nägen , miše sinä henges kazvoid necil kezal .Minei ei ole üks’kaik , miš sinä meletad , kut kazvad , midä valičed ...Nügüd’ minä meletan neciš Aks’onovan poigas , Tol’kas .Meletan Tan’aižes , sinun mamas .Ka i Pahomov , konz pördihe külähä i kulišti , miše sud linneb Aks’onovan päl , ka küzui : "Ei-ik aigahk panda ristitun türmaha .Ved’ hänel kanz om .Pettas erašti om kebn ".
Prokatov melehti i möst sanui :
– Sinus-ki meil oli pagin ei üht kerdad . Sinun-ki polhe sanutihe , miše ei voi sindai hüväle tele oigeta .A minä sinei uskoin , hengel mujuštin .Pahomovale sanuin , miše sinä oled tolkukaz .No ei olend kebn tehta muga , miše voiži panda sindai minun abunikaks .Kolhozan pämez’ sanui minei : ku midä-ni tegese , ka sinä linned värnik .A ved’ minä oližin voinu pettas .Voižin .No en petnus !I minai om hüvä mel’ nügüd’ .
Vas’ka sanui :
– Ala verdu , minä siloi muite sanuin , meletamata .
Prokatov keskusti hänen vaihid :
– Tedan !No kaiken-se enamban meleta ristituiš : mamas , Tan’aižes , Sergejas , Tol’kas ...Meleta , om-ik heile hüvä sinunke olda .El’gendad-ik ?
– Ka , el’gendan .
– Naku hüvä om-ki . Nece om kaik , miš tahtoin sanuda sinei .Nügüd’ mäne .A tulijan kezan , voib olda , möst ühtes radaškam .
Kombainanno hö prostihe .Sid’ Prokatov völ heikahti :
– Vasilii , sanu minun Nast’aižele , miše oigendaiži kenen-ni kal’t minei pinžak .Ika märg sä mugoine om , ei ehti nece kuimaha , sulan tägä , i minun akaižel ei linne hänen arvokast Ivanad !...
Sit' - sarnaline jogi
Veps
New written Veps
–
–
–
–
–
–
Anatolii Petuhov
Сить - таинственная река
Russian
—
—
—
—