Texts
Return to review | Return to list
Karjalaini mieš Vasselei Rohkimainen
history
October 10, 2025 in 14:07 Нина Шибанова
- created the text
- created the text: Šajekuušša 90 vuotta täytti Vasselei (Ville) Rohkimainen. Häntä šanotah viimesekši laukunkantajakši Šuomešša. Vasselei on šyntyn Karjalan Šuvannon kyläššä 6.^ šajekuuta 1935. Poika joutu olomah omašša kyläššä, konša še oli miehitettynä šovan aikana. Šovan jälkeh pereh, missä oli muamo ta kakši veikkuo, vietih toisien kyläläisien kera Šuomen šiirtoleirih. Heilä oli mahollisuš jiähä Šuomeh tahi myöštyö kotih. Karjalašša pereh eli šovan aikana. Kotikyläštä vuotena 1938 oli vankittu ta ammuttu tuatto, kuin kanšan vihollini. A Šuomešša eli heijän ämmö, kumpani mäni šiih muah vuotena 1922. Tietyšti, perehellä ei ollun vaihtoehtuo. Niin alko heijän elämä Šuomešša, missä ei tykätty “ryššijä”, vaikka pakolaiset ei ošattu venäjän kieltäki. Vasselei Rohkimainen opaštu ta šai šähkökorjuajan ammatin. Hiän löysi ičellä kaverin koko ijäkši – tytön Šuvi-Karjalan pakolaisista nimeltäh Margit. Pereheššä šynty kakši lašta, nyt on viisi punukkua. Perehen jäšenet rikeneh keräyvytäh yhteh ta ollah hyvin yštävällisie. Mie tiijän šitä ei ainuoštah kuultuon. Ka meijän šeuralaiset ta Šuomešša eläjät karjalaisien jälkeläiset käytih vuorokkah toini toisien luo kostih ta yhteistilaisukših vuosina 1995–2020. Šemmosien matkojen aikana monet löyvettih vielä i šukulaisie. Niin šaima tietyä, jotta myö Vasselein kera olemma pikkušeukut. Eläkkehellä piäštyö Vasselei Rohkimainen rupesi aktiivisešti ottamah ošua karjalan kulttuurin ta kielen elävyttämiseh. Še on nytki Pohjois-Viena -šeuran unelmatavoiteh, missä Vasselei aina oli hallinnon jäšen. Vasseleita rikeneh kučutah eri tilaisukših, missä hiän tuttavuššuttau väkie vanhah laukunkantajan ammattih. Paičči yhteiskunnallista työtä Vasselei on tunnettu hiihtäjä. Hiän yli 50 kertua otti ošua Tervahiihto-kilpailuih Oulušša. Mainičen vielä, jotta mieš iče rakenti oman talon Oulušša, korjasi vanhan mökin ta kylyn dačalla vanhua karjalaista tyylie šäilyttyän. Vasselei Rohkimainen rakenti monta matkamiehen ristie. Viimeni näkyy täššä kuvašša. Še on uuvvissettu ta ašetettu Maikkulan pakolaiskeškukšešša, mi on šurullini paikka monilla šatoilla pakolaisien jalkeläisillä, šamoin meijän piiristäki. Hyvin jäi mieleh meijän delegatijon käynti šinne, konša šielä avattih “Itkukivi”. Vasselei ikäh huolimatta on oikein reipaš mieš. Hiän nytki käypi mečäššä, poimiu kaikkie meččämarjoja ta vielä i myöy niitä. Toivotamma Vasselei Rohkimaisella ta hänen perehellä lujua tervehyttä ta pitkyä ikyä. Ole aina niin yštävällini! Suali, jotta jo moneh vuoteh ei ole mahollisutta näkeytyo.