Texts

Return to review | Return to list

Tverinkarjalaisilla ilmešty uuši musejo

history

October 10, 2025 in 15:12 Нина Шибанова

• created the text
• created the text: Šyyškuušša Tverissä avattih Tverinkarjalaisien musejo. Alovehen eläjät ta vierahat šuahah tietyä šielä kanšan istorijašta ta kulttuurista. Tverissä avasi ovet uuši Tverinkarjalaisien musejo. Näyttelyšalissa on esillä perintehellisie esinehie, šarjakuvie, kartta ta tietotaulukkoja, kankašpuut ta ruatotarpehie käsitöitä varoin. Joka vierašta varoin pietäh opaš-retkie, kumpasen aikana jokahini löytäy ičellä mitänih mukavua tverinkarjalaisien istorijašta, koti- ta kylyperintehistä, kieleštä, käsitöistä, folklorista ta runoista šekä toisista teemoista. Musejon järještäjät ta oppahat ollah karjalaisien kulttuurista kiinnoštunuot ihmiset. Hyö voijah tuntikaupalla kertuo rakkahašta ruavošta ta kanšan istorijašta šekä šen nykypäivistä. – Meilä tullah eri-ikäset ihmiset, ne, ket kuultih jo tverinkarjalaisista ta ne, ket ei tiijetty mitänä. Meijän musejo on kaupunkin keškukšešša, šentäh ohikulkijatki voijah tulla käymäh. Meijän näyttely vielä ei ole šuuri, šiinä on esinehie, kumpasie myö toima Čaškovon kylän Tverinkarjalaisien kojista šekä Kurčin-Murčin-käsityöpajašta, ka šiitä huolimatta myö voimma kertuo äijän mukavua, šano musejon opaš, aktivisti ta käsityömuasteri Tatjana Žil’tsova. Musejo oli avattu šyyškuun 20.^ päivänä. Juhlallisih avajaisih tuli kaupunkin eläjie ta vierahie, kellä on tärkie tverinkarjalaisien istorijan ta kielen šäilyttämini. Juhlapituo piettih musejon pihašša: šielä järješšettih pieni konsertti ta oli paissettu perintehellisie sriäpnöjä. Musejon isännät kerrottih, mitä mukavua kävijät šuahah nähä ta tiijuštua. Musejo ruatau vain kotvasen aikua, ka šiinä oli jo äijän vierahie. Toičči tulou perehie, kumpasissa oli karjalaisie, hyö muissellah omien vanhempien kertomukšie ta opaš-retki tulou mukavakši pakinakši. Tilua musejuo varoin löyty Žel’abovin kavun 30.^ talošša. Täššä talošša ennein eli runoilija ta kirjuttaja F’odor Glinka, juuri hiän rupesi käyttämäh nimie “tverinkarjalaiset”. Nyt talo on annettu musejoilla – Tverinkarjalaisien musejon nuapurina on vanhojen aikojen retromusejo. Opašretkien lisäkši musejošša šuunnitellah pityä muasteri-oppija, luventoja ta tapuamisie. Musejon järještäjät oikein kiitetäh kaikkija, ket rahalla ta omalla ruavolla autettih uuvven paikan valmistamisešša. Nyt musejon yštävät niise tullah apuh ta tuuvvah musejoh uušie näyttöesinehie. Šuaha lisyä tietuo ta kirjuttautuo opaš-retkellä šuau VK-sosialiverkon domtverskihkarel-ryhmän kautti.