Texts
Return to review | Return to list
Terveh tulla Villajuhlah!
history
October 14, 2025 in 10:32 Нина Шибанова
- created the text
- created the text: Villajuhla-nimini voilokkiluajokšien näyttely toimiu Käsityöammattien talošša. Še on omissettu šajekuušša vietettävällä voilokin kanšainvalisellä päivällä. Voilokin valmissanta (kuiva tahi märkä vanuttamini) on vanha tekniikka. Voilokki-šana muuvvoštu turkkilaisešta oilok-šanašta, mi tarkottau katetta. Šiitä kankahašta tovella luajittih lämpimie katteita, vuatteita, piäkappalehie ta kenkie. Šiivattojen villalla on ihmehellini ominaisuš: šuomukerrokšen anšijošta niijen karvat hankaukšen ta painon vaikutukšen alla lujah tartutah toini toiseh muovoštuan šumpua ta šamah aikah elastista materialie. Venäjällä voilokkie alettih valmistua mongolivallan aikakauvešta alkuan ta lainattih šitä omilta valtuajilta. Voilokin anšijošta myö šaima kanšalliset kenkät – kuatančat. Šamoin voilokilla annettih parennušominaisukšie. Oli šemmoni uškomuš: jotta hoitua tervehekši enneinaikani lapši, pitäy panna hänet kuatanččah. Villajuhla-näyttely keräsi yli 80 voilokkiluajošta noin 30 muasterilta Petroskoista, Aunukšešta ta Kontupohjašta, Lahenpohjan ta Karhumäjen piirilöistä, Moskovašta, Piiteristä, Velikii Novgorodista, Vologdašta, Samarašta ta Murmanskista. Käsityöammattien talon kahešša šalissa on voilokkipanelija ta šeinäkompositijoita, katteita, piäkappalehie, vuatteita, kenkie, naisien ašuštehie, korissukšie, kukloja ta kukkasie. On huomattava, jotta näyttely yhistäy vanhoja tekniikkoja ta käsityön nykyaikasie šuuntie. Piiteristä näyttelyn avajaisih tuli tunnettu voilokkimuasteri, šuurien venäläisien ta kanšainvälisien festivalien järještäjä, voilokkimuasterien luovan liiton opaštaja Irina Zaitseva. Hiän vietti muasteri-opin näyttelyn enšimmäisillä kävijillä. Šajekuušša Villajuhla-näyttelyn rajoissa joka nelläšpäivä pietäh eri muasteri-oppija. Halukkahat šuahah käyvä Karjalan tašavallan kanšan neron ta kulttuurialottehien keškukšen Käsityöammattien talošša ta čukeltua voilokin muailmah šajekuun 31.^ päiväh šuaten.