Texts
Return to review | Return to list
Kaičuztahoiden da rahvahaližiden puištoiden päiv
history
October 28, 2025 in 01:12 Ирина Сотникова
- created the text
- created the text translation
- created the text: Kaičuztahoiden da rahvahaližiden puištoiden päiv — oficialine praznik, mitte pidetas Venäman Federacijas erazvuiččiden ekologižiden organizacijoiden tomotusen mödhe. Nece päivmär praznuitas Venämal joga voden 11.vilukud vodelpäi 1997. Päivmär oli valitud ei muite, 29.tal'vkud vodel 1916 (11.vilukud udeks) oli allekirjutadud käsk ezmäižen Barguzinskijan kaičuztahon (Bur'atian Valdkund) tegemižen mödhe. Venäman Federacijas kaičuztahoiden sijoiden tegemine om tradicionaline i satusekaz azj londusenkaičusen rados. Istorii da praznuičend Kaičuztahoiden da rahvahaližiden puištoiden kaikenvenäman päiv — pen' päivmär ekologoiden kalendariš. Se zavottihe praznuita vodespäi 1997. Ekologad valičiba necen päivän - 11.vilukud Kaičuztahoiden da rahvahaližiden puištoiden päivan praznuičendan täht ei muite. 29.tal'vkud vodel 1916, а udeks — 11.vilukud vodel 1917 Bur'atian Valdkundas oli tehtud ezmäine Venämal valdkundaline kaičuztaho, mitte sai nimen Barguzinskii kaičuztaho (sikš ku se sijadase Barguzinskijan mägišton päivnouzman pautkel). Sügüzel vodel 1916 Venämal oli allekirjutadud käsk "Sändoiden tegendas mectuzkaičuztahoiš", mitte kontroliruib kaičuztahoiden tegemižen järgendust da radod. Om paindud "Valdmehišton käsköiden kogomuses Valdkundan Senatan ohjandusel" № 304 voden 1916 redukun 30.päiväspäi. 29.tal'vkud vodel 1916 (11.vilukud udeks) Venämal ezmäižen kerdan tehtas valdkundaline kaičuztaho — Barguzinskii, Baikalаn randal, mitte radab nügüd'-ki. Kaičuztahon tegiba Ezmäižen mirun voinan aigan, mi sanub siš, miše Venäma andab suren znamoičendan kaičuztahoiden kaičendaha. Valdkundan pätusen tekst ezmäižen kaičuztahon tegemižes oli mugoine: "Man tegemižen ministr 29.tal'vkud vodel 1916 sanui Valdkundan Senatele Barguzinskijan kaičuztahon tegemižes Zabaikal'skijas agjas, Barguzinskijas ujezdas, mitte om Baikalan pohjoiž-päivnouzman randištodme mugoižiš röunhiš..." Läheližil vozil, vodehesai 2020, tehtas völ 11 kaičuztaho. Saratovan agjas-"Saratovskii stepnoi", Uralal — "Šaitan-Tau", Sibiriš — "Belozerskii", "Stepnoi", "Vas'uganskii", "Barabinskii", Zabaikaljes — "Džidinskii", Edahaižes Päivnouzmas — "Sur' Tokko", "Srednekuril'skii" i "Kondjiden sared"-kaičuztaho ei edahan Čukotkan randištospäi. Kaičuztahoiden ližaks tehtas 10 rahvahališt puištod. Läheližes kümnes vodes valdkund rajaškab kümnid milliardoid rubl'ad. Nügüd' Venämal om läz 12 tuhad hüvin kaitud londusentahod, miččil om erazvuiččid kategorijoid, niiden pind om 203 mln gа (sidä kesken man pind ühtes vezištoidenke — 193 mln gа vai kaiken man pindan 11,3 %). Sikš tärktembil londusen kompleksoil da objektoil niiden kaičendan täht om hüvin kaitud londusentahoiden sisteman federaline znamoičend, niiden keskes om 102 valdkundališt kaičuztahod, 42 rahvahališt puištod i 71 valdkundaline londusentaho. Hüvin kaitud londusentahoiden sisteman tegemine om üks' tarbhaižembišpäi Venäman satusišpäi. Hüvin kaitud londusentahoiden sistem, miččel om federaline znamoičend, zavodi hüvin kehitoittas vodelpäi 1992: neciš aigas Venämal oli tehtud 28 ut kaičuztahod, 25 rahvahališt puištod i 11 federaline londusentaho. Kogonaz männudes aigas kaičuztahoiden, rahvahaližiden puištoiden i federaližiden londusentahoiden ühthine man pind om kazvanu läz 80 %-le. Tal'vkus vodel 2011 Venäman valdmehišt vahvištoiti hüvin kaitud londusentahoiden kehitoitusen planan vodehesai 2020, sen tegi Venäman londusenministerstv. Planaha mülüba küzundad, miččed koskeba zakonoidentegendan i valdkundanohjandusen kehitoitust, hüvin kaitud londusentahoiden ekonomižen, rahoitusen radnikkundan holištod, londusenkompleksoiden kaičendad da varjoičendad, kul'turjäl'gestusen kaičendad, turizman kehitoitust, rahvahidenkeskišt ühthižradod i hüvin kaitud londusentahoiden levenzoitandad. Vodehesai 2020 planas oli tehta 11 uz' kaičuztaho, 20 rahvahališt puištod i koume federališt londusentahod. Muga, vodel 2012 Primorskijan agjan suvi-päivlaskmas om tehtud rahvahaline puišt "Leopardan ma", vodel 2013 — rahvahaližed puištod "Kaičii" (Čukotkan avtonomine ümbruzkund) и "Änižen Pomorje" (Arhangel'skan agj). Vodel 2017 Piterin agjas oli tehtud kaičuztaho Suomen lahten Päivnouzm . Kaikes mirus pojav praznik — Rahvahidenkeskeine kaičuztahoiden päiv — praznuitas 24.semendkud Rahvahidenkeskeižen londusenkaičendan ühtištusen tomotusen mödhe. Necil päiväl vodel 1909 Jevropas tehtihe ezmäine rahvahaline puišt.