Texts
Return to list | edit | delete | Create a new | history | Statistics | ? Help
Irina Sotnikova. Palaine mašinan täht
Irina Sotnikova
Palaine mašinan täht
Veps
New written Veps
Svat
om minai kuldaine , lapsuded !Südäin , käded-ki hänel oma kuldaižed ...A mugošt čudokast elo-ozad , kut Ivan Ivanovičal , völ pidab ecta !Voinan aigan hän prihaižen frontale mäni .Ka kuna 10-voččele prihaižele vojuida !Van’oi sijazihe voinešelonoihe , kudambad käveliba Arhangel’skaha .Hän mülüi raudtekundaha .Sigä elädes saldatoiden keskes , Van’oi openzihe kohendamha mašinoid i tošt tehnikad .Sil eli-ki .Konz hän pördihe kodimale – Sergian lahtehe , sigä ei olend nikeda .Kaik : mamoi , viž velled i sizar koliba näl’gha i läžundoihe .Prihad ottihe mašin-traktorankeskusehe .Sil aigal belorusad tugeziba mašin-traktorankeskust .Voinan jäl’ghe äi ristituid tuli elämaha Karjalaha toižiš tahoišpäi .Ühthižkodiš Van’oi kazvoi-ki , vahvdui , lopi küläškolan .Jäl’ges openzihe lidnas traktoristaks .Ka hän tarbhaližeta-ki azjbumagata oli lujas hüvän tehniktundijan .Hüvä ženih oli .Teravas hän löuzi ičeleze nevestan .Kolhozan pämez’ andoi norile polen pertid .Lapsed sünduiba .A sigä mö-ki Ivan Ivanovičanke tegimoiš heimolaižikš .Minä ostin pertin Sergian lahtes , miše olda lähemba heimolaižidennoks .
Sil vihmakahal kezal Ivanovičale täudui 65 vot .Jubilejan jäl’ghe tuli minei bumag počtale : pidab ajada stancijale .Sizar oigenzi minei Ukrainalpäi Zaporožec-mašinan , pidab sada .Siloi oli kebn oigeta erazvuiččid jüguid raudtedme .Van’oi , kut minun "Mersedesan " nägišti , sid’-žo el’genzi , miše melev mez’ ei zavodi ajada sil .Oli muga : sikš ku sizaren mužik koli i mašin seižui azjata , ka hän Zaporožcas pidi kanoid .A jäl’ges päti antta necen raudaižen holen minei .A minei midä tehta ?Svatuško , abuta mil void .Minä en jä velgha .Van’oi kehkerzi kohetes ümbri mašinad , i kahtes päiväs päliči mašin oli kuti uz’ ."Kacu , – sanub , – miččen sinun kartaspäi kanfetaižen olen tehnu ! Tozi , azotimid ei ole .Ei täudu üht tarbhašt palašt , andoi sen velgha tutabale ristitule ..."
Oli Van’oil čudokaz pird : palaižen , kut hän laskvas nimiti tarbhaižen kohendusen täht mašinpalaižen , mitte oli varas , hän andoi velgha aigaks .Koumekümne vot Ivan Ivanovič radoi ajeluzavtobusal , hüvin el’genzi kodimaižiš mehanizmoiš .Koheta ?Kohendam .Minai tarbhaine palaine-ki om .Vaiše pidab pördutada jäl’ges ...
Midä sanuda-ki , motoroiš Van’oi oli parahiman mastarin !Oleskeli muga-ki .Ken-ni tutabišpäi šoferišpäi soitab sel’sovetha , kucub Van’oi-dädäd pagižimennoks i sanub miše , midä-se hänen mašinas mureni .Ivan küzeleb tehnižen vigan znamoid , a oleskeli muga-ki , käskeb toda mašinad lähemba pagižimehe .Kundleb hirnujad motorad telefonan kal’t i andab oiktan vastusen : vajehta mugoine-se i mugoine-se palaine .Nikonz ei ole hairahtanu !
Kohenzi svat minun mašinan , hot’ lidnaha lähte .Minä sid’-žo pagištoitin susedad vedäda mindai keskuztennoks , sigä , kus ajeluzavtobus azotase .Minei tarbiž oli ajada rajonkeskusehe azjoid .I pagištoitin Van’oid ajada .Ved’ midä taht voib ozaitas matkas .Hätken-ik kerazimoiš , ajam .Mašin om tabanke .Ajam tarkašti .Te ei ole pälustadud , mecanvedomašinoil om muretud .Ei ole aigad kacta polihe .Edes om mägi , libund .Sused koumandel pigudel mägen keskennoks ajoi i edemba ajab , kut muga pidab-ki .
Mö Van’oinke ühthe an’he : "Vajehta piguz’ , ika mašin azotase !"Se sanub vastha : "Algat varaikoi !""Vajehta piguz’ , urad ! Toižel pigudel ed libu ".Ani mägen ülähän , lopuks , hän koski piguziden vajehtandan bibud .Trah-tarabah !Mašin mureni !Azotelda ei mil .Ajoim tagaze .Sused ani kaglad ei punotand , mägespäi ohjanzi mašinad , pidihe raižud .Ka jose mugoižel pigudel voib mujada raižud ?Lähembaižel mäthal mašin hüppähti , kumaižihe i – lanksi raidoil kazvanudehe alangoho .Sigä riputaškanzi-ki .Ülähän – taivaz ,alahan – habi eläb heng oksihe tabadase .Ištum päil , varaidam kubahtada-ki .Naku tedme mecanvedomašin ajab .Vedäi nägišti meiden il’mas punojid kezroid .Čududelihe .Azotihe : "Midä tö , mužikad , teget täs ?"Heita sinä meid , hüvä mez’ , neniš ladvoišpäi !"A minä , – sanub , – mijak pöruilendim olen , miše mašinad puišpäi heitta ?" No kaik-se pagištoitim händast .Taci hän laudan .Mö ujuim jäl’geti kovale male .Zaporožcan vedim trosal .
Spasib Jumal , kaik eläbad oma !Vaiše minun karjalaižed sapkaižed kuna-se kadoiba .Tarbiž minei edemba noskiš astta .Ka olgha !Mö Ivanovičanke päzuim völ ei mugoižiš azjoišpäi !Naku Zaporožcale ei vedänd .Nügüd’ hätken seižuškandeb azjata ."Sinä , – tegid-ik ühthevedoid matktegospäi , – minun kacundata ala ištte ohjanduzkezran taga . Varasta , kuni kohendan mašinad .Minä sinei tarbhaižen palaižen panen – ajaškandeb paremba edelišt !Vaiše ei tonugoi völ mugošt palašt .Männudel nedalil toivotadihe toda , ka midä-se ei tulnugoi völ ..."
En ištte , en ištte , armaz minun ristit ...Toižel ehtal svatja kolkotab uksehe : koli Ivan Ivanovič .Unes .Südäin ...Mahapanendkobuiš mäni koume päiväd .Koume päiväd tullei ajoi taivastme mustid vihmpil’vid .Ani kuni iče taivaz voiki žalleites hüväd ristitud ...Kaikel küläl mö kaimzim Ivan Ivanovičad surman matkaha .Pördimoiš kaumištolpäi , tulim pertinno i nägištim : ripub kägäs vanuimel sidotud se tarbhaihe Van’oin palaine .
Palaine mašinan täht
Veps
New written Veps