Texts
Return to list | edit | delete | Create a new | Statistics | ? Help
Gundirev Leonid . Sevastjan
Gundirev Leonid
Sevastjan
Karelian Proper
New written karelian
Havaččeutuma
piäkaupunkissa aikaseh huomenekšella .Tulima tänne eklein illalla pereheni kera .Olima yötä vanhemman tyttäreni Mekin luona , šiih aikah hyö šielä elettih mieheh kera .
On äijän tieloja šuurešša kaupunkissa .Pitäy liäkärilöissä käyvä , varaošie autoh kaččuo .Piti niise viijä šorvaukšeh perämouttorin ta kelkan mouttorin silinterijä .Niät šie kun omašša kaupunkissa niitä ei šorvata .Eikä ole kaikkie liäkärijä .Tai kaupoissa on hyvä käyvä , moušot mitä halvemmalla löytyy .
Kaikki as’s’at luatima päivän aikana tai tulima jälelläh vävyn kortterih .Olipaš ihmeh kun hyö tuotih eteh pieni luatikko , avattih še , a šieltä kaččo meih pikku kikki , ka vieläi karvatoin ...A-voi-voi čuutuo emmä ole tuommoista ennein nähty !Kaikkie šitä pitäy olla muailmašša !Tuommoni kun unešša tulou , ni varmašti havaččeuvut hiki piäššä !
Tiesimähän myö šemmosešta yllätykšeštä .Kun nuorempi An’ukki-tyttö halusi jo pitkäh ičellä kiššan , vain hänen ei šuanun pityä elukkoja kun läsi allergija-astmua .Šilloin hiän i löysi šen kiššanpennun internetin kautti .
Šopima , jotta Vaku-vävy oštau šen , a myö tulemma käymäh tai otamma šen ičelleni .
Ei še mitä .Šovittu mi šovittu !Illallisella "pesimä " šen kikin käpälät stolašša , niin kuin pitäyki .Tuumaičima šamašša nimieki pikku elukalla .Vävyn ehottaman nimen še šai – Silvesteriksi rupesima šitä kuččumah , a Sevakši ta Sevastjaniksi pieninimenä .
Šeuruavana huomenekšena läksimä kotimatkah .Seva matkušti rauhallisešti .Še vet , kačo šie , oli koko matan vaimoni polvilla .Kyllä mieki šielä viihtysin !
No , mäni kotvasen aikua , kišša pikku hil’l’ua kašvo .Ottima šen , konša läksimä šeuruavan kerran Pirttilahteh matkahani .Šinne meijän pitäy venehellä ajua , ei muitein piäše kešällä .Šiitä vielä kotvasen matkua pitäy aštumalla matata pirttih šuati .A kešä oli hyvä , lämmin ta i vihmoja riitti , ni šillä matalla keräsimä valkietalakkua hoš kuin äijä !Oli šitä kripua !
Kun piäsimä pirttih , ni piti ruveta niitä krivoja puhaštamah .Istuuhuin portahilla , panin viereh kripavakan , eteh vesitasan i likašankon , ta rupesin tieluo ruatamah .Šillä aikua toiset halkuo-vettä kannettih , hellua lämmitettih ta ruokua valmissettih .
Šiitä miun luo tuli Seva ta i innoštu krivanpalasie šyömäh kun mie annoin .A tasašša jo pakšu kerroš kripua keräyty .Kikki rupesi jo iče šieltä varaštamah krivanpalasie .Mie en ruohi mitänä šanuo , vain kaččelen .No šiitä še niin ylty , jotta otti ta aštu kripakerrokšen piällä tasah .Eihän še keštän , vaikka pieni vielä oli kikki , upposi še šiih veteh .Eipäše mitänä .Elukkahan še on , hyppäsi-koppasi vatista äkkie ta ihmeissäh – mitä nyt tapahtu ?Oli lämmin kešäpäivä .
Ei ne šienet ole kiššan šyötävie – okšenti Silvesteri krivat pois !
Sevastjan
Karelian Proper
New written karelian