Texts
Return to list | edit | delete | Create a new | Statistics | ? Help
Nina Zaiceva. Virantanaz. 7. Airan starin
Nina Zaiceva
Virantanaz. 7. Airan starin
Veps
New written Veps
Airan enččes
elos ,
i ei vaiše keles ,
oli äjan eroid ,
ani toižid veroid .
Erašti hän sanui
tundmatomid sanoid –
‘torok , ližm i čapta’ …
Velled , vaiše kackat :
tul’ba sanad mel’he ,
ka i vepsän kel’he
suliba ned ani .
Kel’ niid varha pani .
Paksus ištui Aira –
ani muga harjen’ –
küläjogen randal
koivusižel kandol .
Kuti varast’ – vestid
kodin poles ehttas .
Uniš paksus nägi ,
mitte pedroid vägi
oli hänen tatal –
omalužen katab !
Vajehtihe elo –
tatad enamb eilend .
Ka i mamad eilend ...
Paksus pidi meles
maman mustad sil’mad .
Täudund-ki ei il’mad ,
ku maman polhe dumad ,
ned johtutesed rumad
tuleskel’ba pähä ,
ka hengel – sijad vähä .
Pän-ki kibišt’ mustas
igähižes tuskas .
Taivhaze hän kacui ,
kuti armhid kucui .
Kazvatajad kerdan
paimenziba pedroid .
Edahaižes tundras
hüväs säs i purgas
maht’he tehta elod
kuti kodiš , velled !
Aig jo kod’he pörttas ,
kodin polhe sirttas
ani oli tulnu ,
heiš niken ei kulnu .
Oli-k mitte viga
tehnus heile siga ?
Läht’he heid jo ecta ,
ümbri kaiktä kacta .
Hätken rahvast eci
tundras kanzan necen .
Pagištihe küläs ,
miše joged ülös
näht’he heiden jäl’ged ...
Nu a sen jo jäl’ghe
ei-ki olend tedoid .
Oli-k mitte beda ?
Segoiba-ik kuna ?
Mitte gor’a ruma !
Airan muštho tuli –
hän ved’ kerdan kuli
tatan , maman sanoid :
"Bembledme konz mäned ,
taivhaze void päzda ,
linneb ani läznas !
A konz lunad vätas ,
tariž vaiše sätas ,
lunoidennoks mända ,
kus se lämoi vändab .
Mujulämoi iče
taivhaze meid ličeb .
Elo kaik om taivhal :
kazvatajad armhad
amu mänd’he sinna ,
oma taivhan pindal .
Elo sigä hüvä ,
taivhan pohjas süväs ,
sinižes siš mirus
jumalbemblen sires .
Kus om taivhan süvüz’
eläb vaiše hüvüz’ ,
mas ed löuda sida ,
taivhas – elon idu !"
Aira nügüd’ tezi ,
sel’ged ol’ kut vezi :
kazvatajad armhad
ani aigoiš , parhal ,
lunnoidennoks mänd’he .
Pohjoižlunad vät’he
sil tal’vel ani lujas –
kuti hoštai kujo
taivahaze vedi ,
kuti tuli tedo :
tulgat tänna , meile ,
paremb sijad eile !
Sikš-se Aira paksus
ištui irdal lapsen ,
taivhaze hän kacui ,
sil’mid-ki ei racind
käraudamha polhe .
Mam i tat ved’ old’he
sigä , taivhan mirus .
Se ei ole sires ,
kacu , mitte korged !
Kazvatajad orgho
kact’he Airan päle :
vest’tähtaz lanksi male !
Sirotaks jäi Aira ,
kut veneheta airod .
Külä Airas holdui :
eli pertiš noidan ...
Noidannoks äi mehid
kävel’ , vaiše ehti
tehta tervhikš kaikid .
Noidas tedo raigui ...
A mamoi hätken Viral
oli alasijal ...
Tat Viran edhaks mäni ,
Lapin maha ani .
Noid ot’ Airan kerdaks ,
ajoi randha , vepsäks
kus pagižeba mehed ,
kus vezi mugoi lehed ,
kus pud-ki oma sured ...
Airanke hän sarel
jäi-ki elämaha ,
kibuid heitamaha .
Elo tuli mel’he ,
harjeni hän kel’he .
Ičez ‘vežan’ pani
čudokahan ani .
Airas kului pagin ,
miše čoma ani
nece lappalaine ,
hot’ ei-ki mijalaine .
Viras himo süttui
Aira-neiččen lüuta ,
nägištada vaiše .
Hot’ tat-se ani laiše ,
nütkta tukas voili ,
ka telustand-ik oli ?!
I konz lumi suli ,
sarele Vir tuli .
Mustsil’mäsine Aira
vargast’ hengen arni .
Airata – tühj elo ,
ei heläidagoi kellod ,
päiväine ei pašta ...
Südäin löse vaštak
Viran rindhiš siloi ,
i siloi om se ilos ,
konz armaz Aira rindal ,
ičez kodin randal .
Tat sekoida ei ehtnu –
a sai jo oli tehtud !
Virantanaz. 7. Airan starin
Veps
New written Veps
"