Texts
Return to list | edit | delete | Create a new | Statistics | ? Help
Nadežda Vasiljeva. Iivananyö toi taikua
Nadežda Vasiljeva
Iivananyö toi taikua
Karelian Proper
New written karelian
Karjalašša
on tosi vänčistelijä kešä !Kalevalalaiset ei šuotta šanota , jotta meilä šiä muuttuu kuin ilkien ihmisen mieliala .Näin šattu tällä kertuaki : vielä uattona paisto hellä päiväni , a šeuruavana päivänä lopettamatta šato vettä , kuin korvešta kuato ta tuuli kovašti , a pihalämpömittari näytti vain +8.
Paha šiä ei haittan pruasniekkua
Mitein šemmosissa oloissa viettyä Iivanan yöllä šuunniteltuo tilaisutta ?Še oli piettävä Kalevalatalo-etnokulttuurikeškukšen starinamaisella nurmikolla .Pruasniekkua vuotettih pos’olkan eläjät , artistat ta šen järještäjät .
Onnakko Kalevalah tullut paha šiä ei taitan lakkauttua Iivananyönä-iltapruasniekkua .Še mäni etnokulttuurikeškukšen juhlašalissa .Oli vähän ahašta , Iivanan päivän ropivo oli käsin luajittu , ka pruasniekka oli kaunis , vesselä ta mukava .
MKS-teatteristudijon ohjuaja Valentina Saburova ta kanšanlaulun Hyvä mieli -klubin ošallistujat kučuttih kaikki vierahat tuttavušpolkkah .Šiitä alko taikamatkuštamini Iivananyöh , šen starinamaisih muuttumisih , kanšanprimiettoih ta tietošanoih .
Iivananyönä-pruasniekan viettämisen ideja ei šyntyn šattumalta .Še oli šuunnattu kanšanperintehien elvyttämiseh ta šäilyttämiseh .
Viola Malmi lisäsi šuuren panokšen
Enši kertua šemmoni šuuri Iivananpäivän pruasniekka mäni Kalevalašša noin 40 vuotta takaperin .Šilloin šen alkuhpanijana ta järještäjänä oli Viola Malmi , Karjalan tunnettu folkloristi ta kanšanhoreograffi , karjalasien tanšši - ta lauluperintehien šäilyttäjä .Šen vaipumattoman ihmisen anšijošta monet karjalaiset tanššit , hiäpivot ei kavottu meijän kulttuuriohjelmistošta .Viola Malmi äijän matkušti Karjalua myöten .Hiän kävi loittosissa piirilöissä , muun muašša Kalevalašša .Hänen matat runonlaulajien muah lisättih oma panoš : muasterin keryämät kanšanuškomukšet nykyjähki autetah eri kanšanpruasniekkojen viettämiseššä .Iivananyön pruasniekašša kalevalalaiset näytettih niitä folklorierikoisukšie , kumpasista heilä kerto Viola Genrihovna .
Iivananyöllä on taikavoima
Iivananyö ei ole tavallini .Ennein rahvaš ušottih , jotta šinä yönä tavallisimmat asiet šuahah taikavoimua .Neiččyöt ta naiset kyšytäh luonnolta hyvyä šatuo , a miehet – voimua ta lykkyö .Priiskuttelu Iivananpäivän puhtahalla vejellä antau kaikilla tervehyttä .
Kalevalan pruasniekan vierahat šuatih tietuo monista tuntomattomista ritualiloista .Mieltäkiinnittäjimpinä oltih tietošanat rakkahutta ta onnie varoin .Šen aikana joka halukaš nousi noijutun kirvehen piällä ta šai vihon koivuokšista ta šeiččemeštä kukašta , mi simvolisoičči ihmisien haluja .
Šamoin vierahat kyšyttih onnie ta toivomukšien toteutumista kaunehelta koivulta ta kiinitettih šen notkeih okših erivärisie nauhoja .Jokahini smietti omašta peitollisešta asiešta .Toivomuš varmašti toteutuu , vet še toivottih Iivananyönä .
Lisäkši pruasniekan vierahilla tarittih tuokšujua čäijyö karjalaisien sriäpnöjen kera .Aktiivisimmat vierahat piätettih jatkua oman onnen eččuo : yhet lašettih kuvottuja šeppelehie Kuittijärven vesih , a toiset taikayön piätyttyö pešeyvyttih huomenekšellisella kaštiella .Näin ruattih meijän kantatuatot : hyö ušottih Iivananyön taikavoimah .Uškokka šiih myöki !
Iivananyö toi taikua
Karelian Proper
New written karelian