Texts
Return to list | edit | delete | Create a new | Statistics | ? Help
Galina Baburova. “Meiden rad om oigetud armhaze lugijaha”
Galina Baburova
“Meiden rad om oigetud armhaze lugijaha”
Veps
New written Veps
Naku
jo 35 vot "Periodika "- painišt kaičeb da popul’arizoitab Karjalan keliden da kul’turan jäl’gestust .Sigä lähteba eloho lehtesed da kulehtesed , erazvuitte literatur vepsän , karjalan , suomen da venän kelil .Ližaks painišt kehitoitab "Oma Media " -portalad , a Karjalan rahvahiden sebruden kodiš mäneb sadoid azjtegoid , miččiden keskes oma vepsän , karjalan da suomen keliden kursad kaikile tahtnikoile .
Ozatelmaha "Periodikad " znamasižen päivänke tuliba painišton sebranikad , partn’orad , enččed radnikad , valdmehed .Kaikutte heišpäi toivoti "Periodikale " surid satusid tulijal-ki aigal .
– Ülendamoiš , miše meil om mugoine painišt . Se tegeb tarbhašt azjad Karjalan igähižiden rahvahiden keliden kaičendan poles ."Periodikan " südäimes om mahtokahiden radnikoiden jouk . Heiden armastuseta valdkundan kelihe da kul’turaha ei oliži ningošt sur’t painišton satust , – sanui Karjalan valdkundan sijaližen politikan varapämez’ Roman Golubev .
"Periodika "-painišt oli sädud jügedoil vozil Venäman täht . Sen ezmäine pämez’ Lidia Räminen starinoiči praznikal ezmäižiden augotižvoziden radon jügedusiš da spasiboiči kaikid , ken abuti siloi da tugezi painištod ."Periodikan " sebranik Karjalan Rahvahaline arhiv lahjoiči jubilejaks azjbumagoiden kopijad – niiš om Karjalan valdmehišton käsk painišton sädandas .
– Siloi , 90.-vozil , mö em voinugoi eskai meletada , miše painištospäi kazvab mugoine äifunkcionaline kul’turkeskuz , – sanui Lidia Räminen .
– Minun täht "Periodika " ei ole vaiše ezmäine kirjutez radkirjaižes . Ved’ zavodin radelon tägä , "Vienan Karjala " -lehteses , i nece oli kalliž mahtišt minun täht ."Kičči-kočči " -ansambl’aha kävub minun tütär , i "Periodika " hänen täht ei ole vaiše sija , kus mäneba hänen armhan kollektivan vastused – nece om hänen toine kodi , – sanui painišton sebranik , Kelen , literaturan da istorijan institutan pämez’ Irina Novak .
Äi lämid sanoid kului necil päiväl "Periodikan " polhe .Ristitud toivotiba satusid painištole i hengen libutandad sen radnikoile , lahjoičiba lahjoid .Valdmehed da "Periodikan " ohjandaikund andoiba painišton radnikoile kitändkirjeižid .Ved’ radnikoiden kund om "Periodikan " pävägi , ilma nenita ristituita ei oliži sabustusid , kudambid voib nägištada nügüd’ .A lehtmehele om tärged , miše händast lugetižihe .
– Mö služim sanale . Sanal voib i tervehtoitta , i tugeta , i vedäda ičeze jäl’ghe .Toivotan "Periodikale " kitäjad lugijad .Meiden rad om oigetud armhaze lugijaha .Lugijata ei ole kirjutajad , – sanui "Sever "-kulehtesen pätoimitai Jelena Pietiläinen .
“Meiden rad om oigetud armhaze lugijaha”
Veps
New written Veps