Error:
Недостаточно прав на выполнение этой операции
Texts
Return to list | edit | delete | Create a new | Statistics | ? Help
Irina Sotnikova. “Elonpu” änikoičeškanzi Änižen randal
Irina Sotnikova
“Elonpu” änikoičeškanzi Änižen randal
Veps
New written Veps
Kut
ende-ki , se mäni Änižen randal i kerazi lujas äi rahvast .Praznik ühtenzoiti kaikid : lapsid vanhembidenke , külän eläjid , valdmehid , mastarid , sädaikollektivoid da vepsän kul’turan navedijoid .Necil vodel se oli omištadud penile der’ounoile .
Čoma "Elonpu "-praznik zavodihe Šoutjärven muzejanno , kus kaičese voz’sadoiden mušt .Ani sigä , unikaližiden kaluiden keskes , eläb meiden ezitatoiden istorii , heiden radmahtod i tradicijad , miččed andaba meile vägid tämbei .
Hüvän tradicijan mödhe praznikan avaiži Vepsän rahvahan hor .Jäl’ges kaik tulnuded adivod da kollektivad astuiba pajoidenke Änižen randahasai , kus mäni čoma koncert .
Asttes pallištole adivod voiba ihastelda korktoid pedajid da henkta puhthal mecil’mal – iče londuz da läm’ sä necil päiväl toiba kaikile hüväd mel’t .Sen ližaks tedme adivoiden vastha putuiba londuzhenged , ozutesikš mecižand , vedehine .Hö pakičiba adivoid tehta erazvuiččid tegendoid da johtutiba sändoiš siš , kut pidab vedäda ičtaze mecas da vedenno .
Praznikan aigan scenalpäi kuluiba čomad kantelen melodijad , sarnad , rahvahan pajod da vepsän pagin .Ičeladuižed sädaikollektivad – "Varasta ", "Toive ", Vepsän rahvahan hor , "Gornica ", "Randaine ", "Kumuški ", "Kantele "-ansambl’an noriden studii , "Kičči-kočči "- lapsiden grupp – ezitiba ičeze parahimid pajo - da kargnomeroid .
Necil aigal pallištol kehui rad : sijaližed "Kaičei "-sebran mastarid vediba melentartuižid mastar’-klassoid .Kaikutte tahtnik voi opetas paštmaha tradicionaližid vepsläižid kalitoid , kudomaha čomid hurstid da vöid , tehmaha savesižid vihelkoid .Programm oli lujas bohat i hüvin meletadud , niken ei tusttund – lapsile da aigvoččile oli midä tehta da mihe opetas .
Radoi äi möndrivid : adivod voiba ostta ičeleze muštoks praznikan polhe miččen-se käzil tehtud tehmusen , mujada vepsläižid paštatesid da lent .Mugažo rahvahan täht vaumištadihe konkursoid da sportvoibuid – kaikutte voi ozutada ičeze väged , lahjavut da tedoid .
– Minei tuli mel’he , miše adivod kactes koncertad muhaziba – i nece om kuti parahim arvznam minun täht . Minai oma parahimad abunikad , hö lujas abutiba minei praznikan tegemižes .Mö ühtes tegim radoid , kundlim toine tošt , otim pähä hüvid idejoid .Čoman praznikan voib tehta , konz kaik radaba ühtes i tugedaba toine tošt , – sanui Šoutjärven Kul’turpertin pämez’ Jevgenia Kokorina .
Praznikan il’mišt oli läm’ da sebraline .Amu en nägend muga äi rahvast , kaikil oli hüvä mel’ , kaik muhaziba toine toižele .Nägui , miše praznik oli tehtud surel armastusel ičeze jurihe , kodiröunaha , ezitatoiden tradicijoihe .Pidab kitta kaikid , ked abutiba tehta mugoižen čoman praznikan .Se kuti eläbzoiti vepsän mad , a minä kuroks putuin laps’aigaha , konz küliden eläjad kerazihe kuti üks’ sur’ kanz .Elägaha da änikoikaha "Elonpu " igän !
PRAZNIKAN ADIVOIDEN MEL’PIDOD
L’udmila Aleksejeva :
"Meletan , om lujas hivä pihä .Rahvast oli äi , tul’d’he Piterin agjaspäi , Petroskoišpäi , külišpäi .Nece om hivä , mise uz’ pihä mest zavodihe Šuutarves .Änižen randal amu d’o ii olnu mugoižid pihid .I konz praznik oli küläs , ka ii olnu muga äi rahvast .A tämbei mest praznik tehtihe Änižen randal , nece om hivä , nece om meiden kodima .Kaikile , ken tegi praznikan , suur’ spasib ".
L’udmila Mosenzova :
"Tämbei oli lujas hivä praznik .Mugoine čoma sä oli , rahvast äi .Mina olin praznikal kuti kodiš .Nece čoma sija Änižen randal lujas mel’he om .Nece om minun kodima , täs mina keradamoi väged ".
Svetlana Gotič :
"Minä olen rodnuze Šuutarves i tänämbei meil kaikil , pohjoižvepsläižil , om suur’ pühä .Rahvaz om ozakaz , miše praznik udes tehtaze , i nece om tarbhaine azzj .A mitte čoma sä om !Nece pidab meiden hengile , lapsile i vanhoile ristituile , kaikile , ken eläb sid’ , ken om rodnuze täs vai tuleb tänna kezal .Tahtoižin , miše meiden vepsän kul’tur da kel’ eläižiba völ sadoid vot .Minä tämbei nägen , midä mö tegem ühtes – nece om tarbhašt , tob kaikile hüväd mel’t , om lujas čoma azj ".
“Elonpu” änikoičeškanzi Änižen randal
Veps
New written Veps
"
"
"