Texts
Return to list
| edit | delete | Create a new
| Statistics
| ? Help
Kinnermy: 530 vuottu
Source:
Oma mua. № 31, 2026, p. 2
Kinnermy: 530 vuottu
Livvi
New written Livvic
Karjalan Kinnermän kylä on täyttänyh 530 vuottu. Sen kunnivokse kyläs piettih aiga ravei pruazniekku. Tänä vuon pruazniekkupäiväkse Kinnermäle tuodihgi Smolenskoin Jumaldoman obrazu, kudai on ruokos Karjalan taidomuzeis. Sinne obrazu otettih säilytettäväkse vuvvennu 1979. Tämän vuvven pruazniekas Jumaldoman obrazu kannettih ymbäri kyliä, piettih sluužbu časounas.
Obrazan tuondua Kinnermän merkittävinny vuozipäivinny hommuau kyläläine Nadežda Kalmikova. Tälgi kerdua obrazan tuondah nähte sobii Nadežda.
– Ennepäi jo maksoimmo obrazan tuondan da ylen äijäl uskoimmo, ku kai stuanivuu. Smolenskoin Jumaldoman obrazu on ylen vahnu da kallis, sidä tuvva pihale da kannella voibi vaigu povval siäl. Tänä vuon hos taivas buuristelih da pilvie oli, ga vihmua ei luadinuh, ihastuksis saneli Nadežda Kalmikova.
Smolenskoin Jumaldoman obrazal on ylen tärgei merkičys ei vaigu Kinnermän kylän eläjih nähte, ga kogo Vieljärven da Priäžän lohkon uskovazih nähte. Tämä obrazu on eräs vahnimii tämän kolkan obrazoi. Sit on kingei yhtevys meijän ezi-ižien nämmil mualoil elettylöih vuozih da meijän syvih juurih.
Kinnermän pruazniekkua pietäh aivin 10. elokuudu, sidä ei siirreltä aijemba da myöhembä piettäväkse, kui toizii meijän pruazniekkoi. Tälgi kerdua, hos pruazniekkupäivy ugodih ezmäkseargie, kyläh tuli äijy rahvastu – omua kylälästy, ket eletäh nygöi meijän tazavallan da muan eri kolkis, Vieljärven lohkon rahvastu, priäžälästy da petroskoilastu.
Pruazniekas sai ostua paikallizien da tulolazien neroniekoin luajilmustu, syvvä magieloi pastoksii, yhtyö ruadopajoih da nähtä konsertu. Tulolazih nähte oli valmistettu ekskursii kyliä myöte, kuduan pidi Ivan Kalmikov, da ozuttelu, kuduas sai nähtä kylän ennevahnazii kuvii.
Pruazniekkua valmistamas oldih Melliččy-fondu, yhteiskunnalline Kinnermäki-järjestö Karjalan piämiehen grantufondan kannatuksel.
