Texts
Return to list
| edit | delete | Create a new
| Statistics
| ? Help
Sidorkin, Valerii.
Ylissyš pitsien kaunehuolla
Source:
Oma mua. № 31, 2026, p. 8
Sidorkin, Valerii
Ylissyš pitsien kaunehuolla
Karelian Proper
New written karelian
Muotikkahat pitsit -nimini näyttely toimiu Karjalan tašavallan kanšanneron ta kulttuurialottehien keškukšen Käsityöammattien talošša.
Näyttely ylistäy pitsien kutomista. Esillä on pitsisie luajokšie Petroskoin Nero-käsityöammattiakatemijan muasteriloilta šekä heijän šamanmielisiltä Samarašta, Sevastopolista, Permistä, Ivanovošta, Vologdašta, Čerepovetsista, Siktivkarista, Jeletsistä, Velikii Ust’ugista. Kaikkieh näyttely yhistäy yli 50 tekniikašša luajittuja töitä.
Näyttelyn kävijie ihmetytetäh loukolliset palantiinit, peleriinit, liivit, kaklapaikat, hartiepaikat, kaklukšet, kaklaliinat šekä ašuštehet ta korissukšet – roššit, korvirenkahat, rannehrenkahat, helmet. Joka työ on ainutluatuni ta epäilömättä kaunistau vaikka ketä naisista.
Lisäkši esillä on šuurie värivalokuvie petroskoilaisien muasterien luajokšista, kumpasie valittih parahiksi viime vuotena männyöššä pitsitriennalissa.
Šamoin näyttelyn avajaisissa ilmotettih pitsien kutojien kilpailun voittajien nimet Luatijan pitsi-, Luatijan meštaruš-, Pitsini ašušteh - nominatijoissa.
– Käsityöammattien talošša niise viettimä taitoresidenssi, missä muasterit luajittih piiruššukšie, kumpasien mukah ruvetah valmistamah uušie pitsisie luajokšie, kerto näyttelyn kurattori Natalja Igrakova.
Šeuruavana päivänä Muotikkahat pitsit -näyttelyn avajaisien jälkeh šen ošallistujat vietettih Petroskoin valtijoyliopistošša konferenšši, missä käsiteltih pitsien kutomisen kehityštä Karjalašša ta vanhan käsityöammatin välittämistä tulijilla šukupolvilla.
Muotikkahat pitsit -näyttely ottau vaštah kävijie 22. elokuuta šuaten.
