Texts
Return to list
| edit | delete | Create a new
| Statistics
| ? Help
Galina Baburova.
“Kantele”-ansambl’ vaumištab uden vepsläižen programman
Source:
Kodima № 8, 2026, p. 3
Galina Baburova
“Kantele”-ansambl’ vaumištab uden vepsläižen programman
Veps
New written Veps
Petroskoiš mäni "Vepsläižed starinad" -projektan prezentacii. Udehe projektaha ühtneb "Kantele" -ansambl’.
Prezentacii zavodihe "Vepsläižespäi karguspäi luzikoidenke", miččen sädi tetab vepsläine horeograf Vasilii Kononov. Sid’ projektan tegijad da tomotajad starinoičeba, midä melentartušt varastada sen satusišpäi.
"Vepsläižed starinad" -projektan aigan mäneba vepsän kul’turan popul’arizoitandaha oigetud azjtegod. Niiden keskes oma vepsläižed kvizad, miččed starinoičeba vepsän kul’turas erazvuiččiš polišpäi. Kvizad mäneba Karjalan erasiš rajonoiš. Kaik tahtnikad voiba ühtneda niihe.
Sügüz’kus Petroskoiš tehtas konferencii, miččel pagištas siš, kut vepsläižed eläba nügüd’, kut vepsän kel’ da kul’tur kehitotasoiš meiden aigal.
– Päazjan projekt om oigetud norištoho. Mö tahtoim starinoita norele sugupol’vele, ked oma vepsläižed, mitte heil om kul’tur. Nece om tärged ei vaiše Karjalan täht, no kaikuččen ristitun ičetundmusen täht, – starinoiči projektan tomotai, Karjalan arvostadud artist Aleksandra Aniskina.
– Mö surel tahtol hökkähtuim ühtnemaha neche projektaha. Aleksandra Aniskina tuli meidennoks, hänen sil’mäd hoštiba, hän sanui: "Minä olen vepsläine, navedin vepsläižid. Tahtoin kaita necen rahvahan kul’turad! Meil kaik ozastub". I mö uskoim sihe, idei tuli meile mel’he, – sanui "Kantele"- ansambl’an pämez’ Natalja L’vova.
Ližaks planoiš om ajelusid Änižröunan vepsläižihe külihe, kus projektan ühtnikad keradaba fol’klorišt materialad. A 2027. voden keväz’kus vepsläižiden sarnoiden motivoiden mödhe "Kantele"-ansambl’ ozutab teatraliž-horeografižen ezitusen.
– Vepsläižele kul’turale omištadud programmal om erine sija meiden ansambl’an repertuaras. Toivom, miše necen projektan abul repertuar ližadub, i uz’ vepsläine programm tuleb mel’he kacujile, – sanui "Kantele"-ansambl’an taidehohjandai Aleksandr Gorevanov.
Vastusen lopus projektan tegijad kundliba kitändsanoid melentartuižes idejas da saiba nevondoid, miččed abutaba projektan tegemižele. "Vepsläižed starinad" -projektan kirjuti "Kul’turan kehitoitandan liga" -sebr. Projekt oli rahatugetud Karjalan pämehen grantoiden fondal.
