Texts
Return to list
| edit | delete | Create a new
| Statistics
| ? Help
Nadežda Mičurova.
Meigäläzet suures joukos
Source:
Oma mua. 2026. 07.10 (№ 39 (1829)). С. 2
Nadežda Mičurova
Meigäläzet suures joukos
Livvi
New written Livvic
Piiterin Petropavlovskoin linnoituk sen Sobornoil lagevol 25. da 26. syvyskuudu mendih Ven’an luodehalovehen kul’tuuran päivät. Net yhtistettih kerras kolme suurdu piduo: Hobjaine kaglučomendus- da Folk-artan festivualit sego Yhtes myö – Ven’a! -konsertan-telesillan. Hobjaine kaglučomendus -etnofestivualii pietäh jo kuvvettu kerdua. Sen virallizet avajazet oldih piätteniččän. Konsertan allus čomasti pajatti yhtehine hora. Yhtel laval kerryttih miehien horat Piiterin mitropoulies, Siberis da Tihvinän jeparhiespäi. Hobjaine kaglučomendus -festivualih yhtyi 37 taidokollektiivua, pajo- da tansijoukkuo. Yhtes piiteriläzien artistoinke ezityttih vokualu- da horeogruafizet joukot Kaliningruadas, Murmanskas, Pskovan, Vologdan da Leningruadan alovehilpäi, Komis, Mariupol’as, Luganskas da Valgo-Ven’alpäi. Karjalaspäi ozuttamas omua iččie oldih rahvahan pajon Vereja-ansambli da petroskoilazet artistat: Oma pajo -hora da Karjala- folklouruetnogruafine ansambli. "Oma pajo" da "Karjala" varustettih yhtehizen ezityksen. Tietoi Karjalaspäi -pajon myödäh Karjala-ansamblin pläššijät tansittih vahnoi karjalazii tansiloi vai kannot loškettih. Sidä oli mieldykiinnittäi kaččuo.
Muuzikku, pajo da tansi yhtistettih rahvastu
Yhtenny piälimäzis tapahtumis rodih Yhtes myö – Ven’a! -konsertu-telesildu, kudai yhtisti Piiterin Sahalinanke. Zajačii ostrov -kohtas ruadoi käziruadoneroniekoin jarmanku, kus sai ostua kaikenualastu puus luajittuu ezinehty, čomendustu, mualattuu, kuvottuu da ommeltuu veššii. Karjalan tazavallaspäi jarmankah yhtyttih padaniekku Roman Leontjev, sego taidoilijat Ol'ga Potes da Oksana Tučkova. Kahten päivän aigah piiteriläzet da linnan gost’at suadih tävvellizesti čukelduo eri kanzoin kul’tuuroih da viegi luadie fotokuvii mustokse täs festivualis. Hobjaine kaglučomendus -festivualin pidäjat tahtotah, gu festivuali kehittys da jatkus iellehpäigi yhtistäjen eri kanzoin da eriigäzii rahvahii.
Tatjana Zaitseva, rahvahallizen Oma pajo -horan johtai
– Festivuali oli aiga suuri. Kahtekse päiviä Petropavlovskoi linnoitus čukeldui kul’tuurumuailmah. Myö näimmö eri kanzoin kul’tuurua, mittumat myö olemmo eriluaduzet, ga ongi meil yhtehisty. Kaikkii meidy yhtistäy suvaičus pajoh da tansih. Festivualis oli äijy lastu da nuordu. Se on ylen hyvä, gu nuoret voidih nähtä, mittuine bohattu on Ven’an muan kul’tuuru. Oma pajo -hora hyväl mielel otti ozua täh festivualih. Myö ainos olemmo valmehet ylendämäh meijän kieldy da ozuttamah kaikkiel karjalastu kul’tuurua. Se, minun mieles, on ainavoluaduine da äijäl eruou toizis.
