Texts
Return to list
| edit | delete | Create a new
| Statistics
| ? Help
Irina Zaitseva.
Nuoret esittäjät yhissettih perinneh ta nykytaito
Source:
Oma mua. 2026. 14.10 (№ 40 (1830)). С. 2
Irina Zaitseva
Nuoret esittäjät yhissettih perinneh ta nykytaito
Karelian Proper
New written karelian
Šajekuun 5.–10. päivinä Petroskois- sa järješšettih Perintehet-etnoleiri. Nuoret šoittajat, tanššijat ta laulajat Venäjän eri alovehilta čukelluttih kanšanperintehih ta ečittih niijen yhteyttä nykypäiväh.
Tilaisuš jatko etnoleirien šarjua, kummaista pietäh Karjalašša vuuvvešta 2018.
– Entiset projektit košettih perintehellisen kulttuurin yhtä ošua. Tänä vuotena yhissämmä laulamista, musiikkie ta tanššimista. Šiitä tulou minih luaja ta uuši, korošti Etnokulttuurialottehien tuki- ta kehityššiätijön johtaja Tatjana Ledn’ova.
Leirin aihiekši tuli kanšanesittäjäšuuntien ta audiovisualisen taijon nykymuotojen yhissäntä.
Projekti keräsi 45 ošallistujua Tverin, Moskovan, Leningradin, Nižnii Novgorodin, Sverdlovskin, T’umenin, Uljanovskin, Jaroslavlin, Or’olin, Samaran, Orenburgin, Volgogradin alovehilta, Altain alovehpiiristä ta Karjalašta.
Ošallistujat ruattih nelläššä ryhmäššä. Juohattajina oltih Nikita Haritonov, Kristina Tagijeva ta Natalja Mihailova (tanšširyhmä), Arina Anhimkova (lauluryhmä), Jelena Magnitskaja ta Denis Kozlov (šoitinryhmä), Grigorii Arhipov (šähkömusiikkiryhmä).
Nykytanššin opaštaja Kristina Tagijeva tuli T’umenista ta toi uuvven luovan idejan. Joka ošallistuja šai kiven ta otti šen mukah leirin aikana.
– Kiven pitäy tulla prosessin täyšiarvosekši ošallistujakši. Nuoret annetah šillä omie tuntehie, vaikutelmie, merkitykšie. Toivon, jotta loppuperfomanššissa myö niämmä, mitä tulou šiitä, šano Kristina.
Nikita Haritonovin mieleštä kivi on voima, kummaista pitäy työntyä luomalla, jotta še antais hyvän tulokšen.
Avajaisissa ošallistujat tutuššuttih toini toiseh ta juohattajih. Keräytynyitä tervehti Karjalan varakulttuuriministeri Andrei Šibanov. Natalja Mihailova, Arina Anhimkova ta Kiži-musejon ošallistujat vejettih kaikkija Oneganiemiläiseh nuorisopes’s’outah. Perintehelliset kisat opaššettih nuorie luottamah toini toiseh ta annettih tuntie šäilytettävien tapojen lämpyö. Šiitä joka ošallistuja näytti oman esitykšen. Yhet valmissettih še etukäteh, a toiset improvisoitih vaikutelmien ta tuntehien mukah.
Kuuvven päivän aikana nuoret opaššuttih nykyaikaista ta perintehellistä tanššitaituo, vokalie ta iänen disainie šekä ečittih, mitein yhistyä niitä.
Šajekuun 9. päivänä ošallistujat yhissyttih ta näytettih Veneh-loppuperfomanšši Cosmos-hotelissa.
Perintehet-etnoleiri toteutettih Venäjän kulttuurišiätijön tuvella Pereh-kanšallisprojektin federalisen Pereharvot kulttuurin infrastruktuurissa -projektin rajoissa.
