Kiilettä ev ni paginua, ni aziida
Kiilettä ev ni paginua, ni aziida.
Äjin rahvahoin: i venäjän, i skandinavin, i italijan igäkirjossa oli mainittu karielazih nää. Venäja igäkirjoissa enžimäzičči oldie muissutettu karielazet jo 1143 vuudena.
Ülen pitän ajan karielan rahvahalla oli vain paginakiili i ei ollun kirjakiildä. A kuin on paginakiili, niin voit händä püzüttiä kirjakiileh. 1887 vuudena Anastasijalla Tolmačövskoilla oli kirütettu, a šidä laškiittu "Karielan bukvari".
Lähembi miän päivöih (30 vuužiloissa) oli laškiittu ei vähä opašunda kijua: bukvari, šanakirja i toista. Ših aigah školiessa opaššunda mäni karielan kiilellä.
Müühemmä, koonža karielan školat šalvattie, a paissa rubei voimah vain venäjakši, nuurizö rubei unahtamah omua kiildä; vanhemmat ei opaššettu lapšii paissa karielakši — hilläkkaze karielan kiili rubei kevhistümah, unahtumah.
Nüt tuli töine aiga. Voit ei peittä omua kiildä, a karielazilla voit paissa toine toizenke karielakši.
Ših varoin, kuin andua karielan kiilellä toine eländä, pidäv ei vähä luadii. I enžimäne azii — OPAŠTUA OPAŠTAI. Tämän aziin, mivla on miilešša, ottav Lihoslavlän pedagogičeskoi opašto, kumbazešša jo toine vuuži opaššutah karielan kiildä.
On viilä šuuri azii — ÜKSI KIRJAKIILI KAIKILLA KARIELAN RAHVAHOILLA, kumbazet täh šua paissa jogo rannašša omah rukah, omalla dialektalla.
Mivla on miilešša, karielan kiilellä on huumnis päivä i parembi eländä. Muissuttua äjaldi unahettu kiili, andua hänellä töine hengi on viäšša vain tverin karielan rahvahalla.
A. Pilügin, Tverin karielan kulturin ühtükšen predan zamestitelä
